ಹೊಸ ನಿಯಮ ಚಾಲನೆ, ಒಂದು ಕುಟುಂಬಕ್ಕೆ ಒಂದೇ ಕನೆಕ್ಷನ್

ಹೊಸ ದೆಹಲಿ.01ಜೂನ್.26:ಕೇಂದ್ರ ಸರ್ಕಾರವು ದೇಶದಲ್ಲಿ ಎಲ್‌ಪಿಜಿ ಸಿಲಿಂಡರ್ ಬಳಕೆಗೆ ಸಂಬಂಧಿಸಿದಂತೆ ಮಹತ್ವದ ನಿಯಮವೊಂದನ್ನು ಜಾರಿಗೆ ತಂದಿದೆ. ಗ್ಯಾಸ್ ನಿಯಂತ್ರಣ ಕಾಯ್ದೆಗೆ ತಿದ್ದುಪಡಿ ತಂದಿರುವ ಸರ್ಕಾರ, ‘ಒಂದು ಕುಟುಂಬಕ್ಕೆ ಒಂದೇ ಕನೆಕ್ಷನ್’ ನಿಯಮವನ್ನು ಕಡ್ಡಾಯಗೊಳಿಸಿದೆ.

ಇದರ ಅನ್ವಯ, ಒಂದೇ ಮನೆಯಲ್ಲಿ ಒಂದಕ್ಕಿಂತ ಹೆಚ್ಚು ಗ್ಯಾಸ್ ಕನೆಕ್ಷನ್ ಹೊಂದುವುದು ಇನ್ಮುಂದೆ ಕಾನೂನುಬಾಹಿರವಾಗಲಿದೆ.

ಈ ಹೊಸ ಆದೇಶದ ಬೆನ್ನಲ್ಲೇ ದೇಶದ ಪ್ರಮುಖ ತೈಲ ಮಾರಾಟ ಕಂಪನಿಗಳಾದ ಇಂಡಿಯನ್ ಆಯಿಲ್  ಎಚ್‌ಪಿಸಿಎಲ್  ಮತ್ತು ಭಾರತ್ ಪೆಟ್ರೋಲಿಯಂ  ಜಂಟಿ ಸಾರ್ವಜನಿಕ ಪ್ರಕಟಣೆ ಹೊರಡಿಸಿದ್ದು, ಗ್ರಾಹಕರು ತಮ್ಮ ಬಳಿ ಇರುವ ಹೆಚ್ಚುವರಿ ಕನೆಕ್ಷನ್‌ಗಳನ್ನು ತಕ್ಷಣವೇ ಹಿಂತಿರುಗಿಸುವಂತೆ ಸೂಚಿಸಿವೆ.

ಹೊಸ ಎಲ್‌ಪಿಜಿ ನಿಯಮದ ಪ್ರಮುಖ ಅಂಶಗಳು:

ಕುಟುಂಬಕ್ಕೆ ಒಂದೇ ಸಂಪರ್ಕ: ಪತಿ, ಪತ್ನಿ, ಅವಿವಾಹಿತ ಮಕ್ಕಳು ಮತ್ತು ಅವಲಂಬಿತ ಪೋಷಕರನ್ನು ಒಳಗೊಂಡ, ಒಂದೇ ಅಡುಗೆಮನೆ ಹೊಂದಿರುವ ಒಂದು ಕುಟುಂಬಕ್ಕೆ ಕೇವಲ ಒಂದು ಎಲ್‌ಪಿಜಿ ಸಂಪರ್ಕ ಮಾತ್ರ ಸಿಗಲಿದೆ.

ಸರಬರಾಜು ಸ್ಥಗಿತ: ನಿಯಮ ಉಲ್ಲಂಘಿಸಿ ಹೆಚ್ಚುವರಿ ಕನೆಕ್ಷನ್ ಇಟ್ಟುಕೊಂಡಿರುವ ಕುಟುಂಬಗಳ ಗ್ಯಾಸ್ ಸಂಪರ್ಕವನ್ನು ತೈಲ ಕಂಪನಿಗಳು ತಕ್ಷಣವೇ ಕಡಿತಗೊಳಿಸಲಿವೆ. ಹೆಚ್ಚುವರಿ ಸಿಲಿಂಡರ್‌ಗಳನ್ನು ಮರಳಿ ಒಪ್ಪಿಸಿದ ನಂತರವಷ್ಟೇ ಗ್ಯಾಸ್ ಸೇವೆ ಮತ್ತೆ ಆರಂಭವಾಗಲಿದೆ.

ಬ್ಯಾಕಪ್ ಸಿಲಿಂಡರ್ ಅವಕಾಶ: ಹೆಚ್ಚುವರಿ ಕನೆಕ್ಷನ್ ಅನ್ನು ಸರೆಂಡರ್ ಮಾಡಿದ ನಂತರ, ಗ್ರಾಹಕರು ಬೇಕಿದ್ದರೆ ತಮ್ಮ ಅಸ್ತಿತ್ವದಲ್ಲಿರುವ ಕನೆಕ್ಷನ್ ಅನ್ನು ಡಬಲ್ ಬಾಟಲ್ ಕನೆಕ್ಷನ್ ಆಗಿ ಪರಿವರ್ತಿಸಿಕೊಂಡು, ಬ್ಯಾಕಪ್ ಸಿಲಿಂಡರ್ ಪಡೆಯಬಹುದು.

ಪಿಎನ್‌ಜಿ ಗ್ರಾಹಕರಿಗೆ 30 ದಿನಗಳ ಗಡುವು
ಮನೆಗಳಿಗೆ ಪೈಪ್‌ಲೈನ್ ಮೂಲಕ ನೈಸರ್ಗಿಕ ಅನಿಲ ಸಂಪರ್ಕ ಪಡೆದಿರುವ ಗ್ರಾಹಕರಿಗೂ ಹೊಸ ನಿಯಮ ಅನ್ವಯಿಸಲಿದೆ.
ಪಿಎನ್‌ಜಿ ಸಂಪರ್ಕ ಪಡೆದ 30 ದಿನಗಳ ಒಳಗಾಗಿ ಗ್ರಾಹಕರು ತಮ್ಮ ಎಲ್‌ಪಿಜಿ ಕನೆಕ್ಷನ್ ಅನ್ನು ಕಡ್ಡಾಯವಾಗಿ ಸರೆಂಡರ್ ಮಾಡಬೇಕಾಗುತ್ತದೆ.

ಇಲ್ಲವೇ, ಅವರು ‘ಟ್ರಾನ್ಸ್‌ಫರ್ ವೋಚರ್’  ಅನ್ನು ಪಡೆದುಕೊಳ್ಳಬಹುದು. ಇದರಿಂದ ಮುಂದಿನ ದಿನಗಳಲ್ಲಿ ಪಿಎನ್‌ಜಿ ಸೌಲಭ್ಯವಿಲ್ಲದ ಪ್ರದೇಶಕ್ಕೆ ಸ್ಥಳಾಂತರಗೊಂಡಾಗ, ಮತ್ತೆ ಎಲ್‌ಪಿಜಿ ಸಂಪರ್ಕವನ್ನು ಮರುಸಕ್ರಿಯಗೊಳಿಸಲು ಸಾಧ್ಯವಾಗುತ್ತದೆ.

ಸರ್ಕಾರದ ಈ ನಿರ್ಧಾರದ ಮುಖ್ಯ ಉದ್ದೇಶಗಳೇನು?
ಅರ್ಹರಿಗೆ ಎಲ್‌ಪಿಜಿ ಸೌಲಭ್ಯ: ಸಬ್ಸಿಡಿ ಸಹಿತ ಗ್ಯಾಸ್ ಸಿಲಿಂಡರ್‌ಗಳ ದುರ್ಬಳಕೆ ತಡೆದು, ನಿಜವಾದ ಅಗತ್ಯವಿರುವ ಬಡ ಕುಟುಂಬಗಳಿಗೆ ಹೊಸ ಎಲ್‌ಪಿಜಿ ಸಂಪರ್ಕಗಳನ್ನು ಕಲ್ಪಿಸುವುದು.

ಕಪ್ಪು ಮಾರುಕಟ್ಟೆಗೆ ಬ್ರೇಕ್: ಗೃಹಬಳಕೆಯ ಸಿಲಿಂಡರ್‌ಗಳ ಅಕ್ರಮ ದಾಸ್ತಾನು ಮತ್ತು ಕಪ್ಪು ಮಾರುಕಟ್ಟೆಯಲ್ಲಿ ಮಾರಾಟ ಮಾಡುವುದನ್ನು ತಡೆಯುವುದು.

ಪರಿಸರಸ್ನೇಹಿ ಇಂಧನಕ್ಕೆ ಪ್ರೋತ್ಸಾಹ: ಎಲ್‌ಪಿಜಿಗಿಂತ ಹೆಚ್ಚು ಸುರಕ್ಷಿತ ಮತ್ತು ಸ್ವಚ್ಛ ಇಂಧನವಾಗಿರುವ ಪಿಎನ್‌ಜಿ (PNG) ಬಳಕೆಯನ್ನು ಉತ್ತೇಜಿಸುವುದು.

ಗ್ರಾಹಕರಿಗೆ ತೈಲ ಕಂಪನಿಗಳ ಮಹತ್ವದ ಸೂಚನೆ
ನಿಮ್ಮ ಮನೆಯಲ್ಲಿ ಒಂದಕ್ಕಿಂತ ಹೆಚ್ಚು ಗ್ಯಾಸ್ ಸಂಪರ್ಕಗಳಿದ್ದರೆ, ಯಾವುದೇ ದಂಡ ಅಥವಾ ತೊಂದರೆಗೆ ಒಳಗಾಗುವ ಮುನ್ನ ತಕ್ಷಣವೇ ನಿಮ್ಮ ಸ್ಥಳೀಯ ಗ್ಯಾಸ್ ವಿತರಕರನ್ನು  ಸಂಪರ್ಕಿಸಿ ಹೆಚ್ಚುವರಿ ಸಿಲಿಂಡರ್ ಅನ್ನು ಒಪ್ಪಿಸುವಂತೆ ಮೂರೂ ತೈಲ ಕಂಪನಿಗಳು ಗ್ರಾಹಕರಲ್ಲಿ ಮನವಿ ಮಾಡಿವೆ. ಈ ಪ್ರಕ್ರಿಯೆಯನ್ನು ಗ್ರಾಹಕರು ಆನ್‌ಲೈನ್ ಮೂಲಕವೂ ಪೂರ್ಣಗೊಳಿಸಲು ಅವಕಾಶ ಕಲ್ಪಿಸಲಾಗಿದೆ.