ಕೇಂದ್ರ ಸರ್ಕಾರಿ ನೌಕರರಿಗೆ 8ನೇ ಕೇಂದ್ರ ವೇತನ ಆಯೋಗದ ರಚನೆಗೆ ಸಂಬಂಧಿಸಿದಂತೆ ಭಾರತ ಸರ್ಕಾರವು ಅಧಿಕೃತ ಗೆಜೆಟ್ ಪ್ರಕಟಣೆಯನ್ನು (The Gazette of India) ಹೊರಡಿಸಿದೆ. ಕೇಂದ್ರ ಸರ್ಕಾರದ ಹಣಕಾಸು ಸಚಿವಾಲಯದ ವೆಚ್ಚ ಇಲಾಖೆಯು ಈ ಕುರಿತು ಮಾಹಿತಿ ತಿಳಿಸಿದ್ದಾರೆ.
ಕೇಂದ್ರ ಸರ್ಕಾರ 8ನೇ ವೇತನ ಆಯೋಗದ ನೇತೃತ್ವ ವಹಿಸಲಿರುವ ಪ್ರಮುಖರು: ನೂತನವಾಗಿ ರಚನೆಗೊಂಡಿರುವ ಈ ವೇತನ ಆಯೋಗಕ್ಕೆ ಹಿರಿಯ ಗಣ್ಯರನ್ನು ನೇಮಕ ಮಾಡಲಾಗಿದ್ದು, ವಿವರ ಹೀಗಿದೆ:
ಅಧ್ಯಕ್ಷರು: ಗೌರವಾನ್ವಿತ ಶ್ರೀಮತಿ ನ್ಯಾಯಮೂರ್ತಿ ರಂಜನಾ ಪ್ರಕಾಶ್ ದೇಸಾಯಿ (ನಿವೃತ್ತ ನ್ಯಾಯಾಧೀಶರು).
ಅರೆಕಾಲಿಕ ಸದಸ್ಯರು: ಪ್ರೊ. ಪुलಕ್ ಘೋಷ್.
ಸದಸ್ಯ-ಕಾರ್ಯದರ್ಶಿ: ಶ್ರೀ ಪಂಕಜ್ ಜೈನ್.
ವರದಿ ಸಲ್ಲಿಕೆಗೆ 18 ತಿಂಗಳ ಗಡುವು: ದೆಹಲಿಯನ್ನು ಪ್ರಧಾನ ಕಚೇರಿಯನ್ನಾಗಿ ಹೊಂದಲಿರುವ ಈ ಆಯೋಗವು ತನ್ನ ಅಧಿಕೃತ ರಚನೆಯ ದಿನಾಂಕದಿಂದ ಒಟ್ಟು 18 ತಿಂಗಳ ಒಳಗೆ ತನ್ನ ಅಂತಿಮ ಶಿಫಾರಸುಗಳನ್ನು ಸರ್ಕಾರಕ್ಕೆ ಸಲ್ಲಿಸಬೇಕಾಗುತ್ತದೆ. ಒಂದು ವೇಳೆ ಅಗತ್ಯ ಕಂಡುಬಂದಲ್ಲಿ, ಕೆಲವು ವಿಷಯಗಳ ಮೇಲೆ ಮಧ್ಯಂತರ ವರದಿಗಳನ್ನು (Interim Reports) ನೀಡುವ ಅಧಿಕಾರವನ್ನೂ ಆಯೋಗಕ್ಕೆ ನೀಡಲಾಗಿದೆ.
ಆಯೋಗದ ಪರಿಶೀಲನೆಗೆ ಒಳಪಡುವ ನೌಕರರ ವಿಭಾಗಗಳು:
ಕೇಂದ್ರ ಸರ್ಕಾರಿ ನೌಕರರು ಮಾತ್ರವಲ್ಲದೆ ವಿವಿಧ ವಲಯಗಳ ಸಿಬ್ಬಂದಿಯ ವೇತನ, ಭತ್ಯೆ ಮತ್ತು ಇತರೆ ಸೌಲಭ್ಯಗಳನ್ನು ತರ್ಕಬದ್ಧಗೊಳಿಸುವ ಜವಾಬ್ದಾರಿಯನ್ನು ಆಯೋಗಕ್ಕೆ ನೀಡಲಾಗಿದೆ. ಆ ಪ್ರಮುಖ ವಿಭಾಗಗಳು ಇಲ್ಲಿವೆ:
ಕೇಂದ್ರ ಸರ್ಕಾರದ ಕೈಗಾರಿಕಾ ಮತ್ತು ಬೌದ್ಧಿಕ ವಲಯದ (Industrial and Non-industrial) ನೌಕರರು.
ಅಖಿಲ ಭಾರತ ಸೇವೆಗಳ (All India Services) ಅಧಿಕಾರಿಗಳು.
ರಕ್ಷಣಾ ಪಡೆಗಳ (Defence Forces) ಸಿಬ್ಬಂದಿ.
ಕೇಂದ್ರಾಡಳಿತ ಪ್ರದೇಶಗಳ (Union Territories) ಸಿಬ್ಬಂದಿ.
ಭಾರತೀಯ ಲೆಕ್ಕಪರಿಶೋಧನೆ ಮತ್ತು ಲೆಕ್ಕಬರಹ ಇಲಾಖೆಯ (IA&AD) ಅಧಿಕಾರಿ ಹಾಗೂ ನೌಕರರು.
ಸಂಸತ್ತಿನ ಕಾಯ್ದೆಯಡಿ ರಚಿಸಲಾದ ನಿಯಂತ್ರಣ ಮಂಡಳಿಗಳ (Regulatory Bodies – ಆರ್ಬಿಐ ಹೊರತುಪಡಿಸಿ) ಸದಸ್ಯರು.
ಭಾರತದ ಸುಪ್ರೀಂ ಕೋರ್ಟ್ನ ಅಧಿಕಾರಿಗಳು ಹಾಗೂ ನೌಕರರು.
ಕೇಂದ್ರಾಡಳಿತ ಪ್ರದೇಶಗಳು ವೆಚ್ಚ ಭರಿಸುವ ಹೈಕೋರ್ಟ್ಗಳ ಸಿಬ್ಬಂದಿ ಮತ್ತು ಅಲ್ಲಿನ ಅಧೀನ ನ್ಯಾಯಾಲಯಗಳ ನ್ಯಾಯಾಂಗ ಅಧಿಕಾರಿಗಳು.
ನ್ಯಾಯಾಂಗ ಅಧಿಕಾರಿಗಳಿಗೆ ವಿಶೇಷ ಸೂಚನೆ: ಸುಪ್ರೀಂ ಕೋರ್ಟ್ನ 1993ರ ಐತಿಹಾಸಿಕ ತೀರ್ಪಿನ ಅನ್ವಯ, ನ್ಯಾಯಾಧೀಶರ ಸೇವಾ ನಿಯಮಾವಳಿಗಳನ್ನು ಆಡಳಿತಾತ್ಮಕ ಕಾರ್ಯಾಂಗಕ್ಕೆ ಲಿಂಕ್ ಮಾಡದಂತೆ, ನ್ಯಾಯಾಂಗದ ವಿಶೇಷ ಅಗತ್ಯತೆಗಳಿಗೆ ತಕ್ಕಂತೆ ರೂಪಿಸಲು ಸೂಚಿಸಲಾಗಿದೆ.
ಆಯೋಗದ ಪ್ರಮುಖ ಕಾರ್ಯಸೂಚಿಗಳು (Terms of Reference):
ವೇತನ ಆಯೋಗವು ವರದಿ ಸಿದ್ಧಪಡಿಸುವಾಗ ಕೇವಲ ವೇತನ ಹೆಚ್ಚಳ ಮಾತ್ರವಲ್ಲದೆ, ಆಡಳಿತಾತ್ಮಕ ದಕ್ಷತೆಯನ್ನು ಹೆಚ್ಚಿಸುವ ಈ ಕೆಳಗಿನ ಪ್ರಮುಖ ಅಂಶಗಳ ಕಡೆಗೆ ಗಮನ ಹರಿಸಲಿದೆ:
ಪ್ರತಿಭೆಗಳನ್ನು ಆಕರ್ಷಿಸುವುದು: ಪ್ರತಿಭಾವಂತರನ್ನು ಸರ್ಕಾರಿ ಸೇವೆಗೆ ಆಕರ್ಷಿಸುವ ಹಾಗೂ ಕೆಲಸದ ಸಂಸ್ಕೃತಿಯಲ್ಲಿ ಜವಾಬ್ದಾರಿ, ದಕ್ಷತೆ ಮತ್ತು ಪಾರದರ್ಶಕತೆಯನ್ನು ಹೆಚ್ಚಿಸುವಂತಹ ವೇತನ ಶ್ರೇಣಿಯನ್ನು ಸಿದ್ಧಪಡಿಸುವುದು.
ಬೋನಸ್ ಮತ್ತು ಕಾರ್ಯಕ್ಷಮತೆ: ಪ್ರಸ್ತುತ ಚಾಲ್ತಿಯಲ್ಲಿರುವ ಬೋನಸ್ ಯೋಜನೆಗಳನ್ನು ಪರಿಶೀಲಿಸಿ, ಉತ್ತಮ ಕಾರ್ಯಕ್ಷಮತೆ ಹಾಗೂ ಪ್ರೊಡಕ್ಟಿವಿಟಿಗೆ ತಕ್ಕಂತೆ ಪ್ರೋತ್ಸಾಹಧನ ನೀಡುವ ಮಾನದಂಡಗಳನ್ನು ಶಿಫಾರಸು ಮಾಡುವುದು.
ಭತ್ಯೆಗಳ ತರ್ಕಬದ್ಧಗೊಳಿಸುವಿಕೆ: ಸದ್ಯ ಜಾರಿಯಲ್ಲಿರುವ ನೂರಾರು ಭತ್ಯೆಗಳನ್ನು ಮರುಪರಿಶೀಲಿಸಿ, ಅವುಗಳ ಅತಿಯಾದ ಸಂಖ್ಯೆಯನ್ನು ಕಡಿಮೆಗೊಳಿಸಿ ಸರಳೀಕರಿಸುವುದು.
ಗ್ರೆಚ್ಯುಟಿ ಮತ್ತು ಪಿಂಚಣಿ ವಿಮರ್ಶೆ: ರಾಷ್ಟ್ರೀಯ ಪಿಂಚಣಿ ವ್ಯವಸ್ಥೆ (NPS) ಮತ್ತು ಇಂಟಿಗ್ರೇಟೆಡ್ ಪಿಂಚಣಿ ಯೋಜನೆ (UPS) ವ್ಯಾಪ್ತಿಗೆ ಬರುವ ಹಾಗೂ ಬರದ ನೌಕರರ ಮರಣ ಮತ್ತು ನಿವೃತ್ತಿ ಗ್ರೆಚ್ಯುಟಿ (Death-cum-Retirement Gratuity) ಮತ್ತು ಪಿಂಚಣಿಯನ್ನು ಕೂಲಂಕಷವಾಗಿ ಪರಿಶೀಲಿಸುವುದು.
ವರದಿ ಸಿದ್ಧತೆಗೆ ಹಣಕಾಸು ಇಲಾಖೆಯ ಷರತ್ತುಗಳು:
ಆಯೋಗವು ತನ್ನ ಶಿಫಾರಸುಗಳನ್ನು ನೀಡುವಾಗ ದೇಶದ ಪ್ರಸ್ತುತ ಆರ್ಥಿಕ ಪರಿಸ್ಥಿತಿ, ಹಣಕಾಸಿನ ಶಿಸ್ತು (Fiscal Prudence), ದೇಶದ ಅಭಿವೃದ್ಧಿ ಮತ್ತು ಕಲ್ಯಾಣ ಯೋಜನೆಗಳಿಗೆ ಬೇಕಾಗುವ ಸಂಪನ್ಮೂಲಗಳ ಲಭ್ಯತೆ, ಕಾಂಟ್ರಿಬ್ಯೂಟರಿ ಅಲ್ಲದ ಪಿಂಚಣಿಯ ವೆಚ್ಚಗಳು, ಖಾಸಗಿ ವಲಯದ ವೇತನದ ಮಟ್ಟ ಹಾಗೂ ಕೇಂದ್ರದ ನಿರ್ಧಾರದಿಂದ ರಾಜ್ಯ ಸರ್ಕಾರಗಳ ಬಜೆಟ್ ಮೇಲಾಗುವ ಆರ್ಥಿಕ ಪರಿಣಾಮಗಳನ್ನು ಸೂಕ್ಷ್ಮವಾಗಿ ಅವಲೋಕಿಸಬೇಕಾಗುತ್ತದೆ.
ಆಯೋಗಕ್ಕೆ ಅಗತ್ಯವಿರುವ ಎಲ್ಲಾ ಮಾಹಿತಿ ಮತ್ತು ದಾಖಲೆಗಳನ್ನು ಒದಗಿಸುವಂತೆ ಭಾರತ ಸರ್ಕಾರದ ಎಲ್ಲಾ ಸಚಿವಾಲಯಗಳು ಮತ್ತು ಇಲಾಖೆಗಳಿಗೆ ಹಣಕಾಸು ಇಲಾಖೆಯ ಕಾರ್ಯದರ್ಶಿ ವಿ. ವುವಲ್ನಾಮ್ ಅವರು ಈ ಗೆಜೆಟ್ ಆದೇಶದ ಮೂಲಕ ಸೂಚಿಸಿದ್ದಾರೆ.
Any questions related to 8th Central Pay Commission ರಚನೆಗೆ ಸಂಬಂಧಿಸಿದಂತೆ ಭಾರತ ಸರ್ಕಾರವು ಅಧಿಕೃತ ಗೆಜೆಟ್ ಪ್ರಕಟಣೆ?