ಕಾನೂನು ಸಲಹೆ ಪಡೆದು ಮುಂದಿನ ಕ್ರಮ ಕೈಗೊಳ್ಳಲಾಗುತ್ತದೆ. | ಡಾ. ಎಂ.ಸಿ.ಸುಧಾಕರ್ ಉನ್ನತ ಶಿಕ್ಷಣ ಸಚಿವ

ಬೆಂಗಳೂರು.25.ಸೆಪ್ಟೆಂಬರ್.25:- ಸರ್ಕಾರಿ ಪ್ರಥಮ ದರ್ಜೆ ಕಾಲೇಜುಗಳ ಅತಿಥಿ ಉಪನ್ಯಾಸಕರ ನೇಮಕಾತಿ ವಿಚಾರ ಕೋರ್ಟ್ ಮೆಟ್ಟಿಲೇರಿದ್ದು, ತಜ್ಞರ ಸಲಹೆ ಪಡೆದು ಬಿಕ್ಕಟ್ಟು ನಿವಾರಣೆಗೆ ಶಿಕ್ಷಣ ಇಲಾಖೆ ಮುಂದಾಗಿದೆ.

ಅತಿಥಿ ಉಪನ್ಯಾಸಕರನ್ನು ನೇಮಕ ಮಾಡಿಕೊಳ್ಳಲು ಕೆ-ಸೆಟ್/ನೆಟ್/ಪಿಎಚ್.ಡಿ ಅರ್ಹತೆ ಹೊಂದಿರಬೇಕು ಎಂದು ವಿಶ್ವವಿದ್ಯಾಲಯಗಳ ಅನುದಾನ ಅಯೋಗವು (ಯುಜಿಸಿ) ಮಾನದಂಡ ನಿಗದಿ ಮಾಡಿದೆ. ಆದರೆ, ರಾಜ್ಯದಲ್ಲಿ ಅರ್ಹತೆ ಹೊಂದಿಲ್ಲದ ಮತ್ತು ಹತ್ತಾರು ವರ್ಷಗಳ ಸೇವಾ ಅನುಭವ ಇರುವ ಸಾವಿರಾರು ಅತಿಥಿ ಉಪನ್ಯಾಸಕರು ಕಾರ್ಯನಿರ್ವಹಿಸುತ್ತಿದ್ದಾರೆ.

ಮಾನವೀಯತೆ ದೃಷ್ಟಿಯಿಂದ ಅತಿಥಿ ಉಪನ್ಯಾಸಕರನ್ನು ನೇಮಕ ಮಾಡಿಕೊಳ್ಳುವುದು ಸರ್ಕಾರದ ಉದ್ದೇಶವಾದರೂ ಪ್ರಕರಣ ನ್ಯಾಯಾಲಯದಲ್ಲಿದೆ.

ಸಮಸ್ಯೆ ಬಗೆಹರಿಸಲು ಸರ್ಕಾರವು ಪ್ರತಿದಿನ ಪ್ರಯತ್ನಿಸುತ್ತಿದೆ. ಕಾನೂನು ತೊಡಕಿನಿಂದ ಸಮಸ್ಯೆ ಇತ್ಯರ್ಥವಾಗುತ್ತಿಲ್ಲ. ಹೀಗಾಗಿ, ಕಾನೂನು ಸಲಹೆ ಪಡೆದು ಮುಂದಿನ ಕ್ರಮ ಕೈಗೊಳ್ಳಲಾಗುತ್ತದೆ. | ಡಾ. ಎಂ.ಸಿ.ಸುಧಾಕರ್ ಉನ್ನತ ಶಿಕ್ಷಣ ಸಚಿವ

ಕಾನೂನು ತೊಡಕಿನಿಂದ ನೇಮಕ ಮಾಡಿಕೊಳ್ಳಲು ಸಾಧ್ಯವಾಗುತ್ತಿಲ್ಲ ಎನ್ನುತ್ತಾರೆ ಇಲಾಖೆ ಉನ್ನತ ಅಧಿಕಾರಿಗಳು. ಕಾನೂನು ತೊಡಕೇನು?: ಅತಿಥಿ ಉಪನ್ಯಾಸಕರನ್ನು ನೇಮಕ ಮಾಡುವ ವಿಚಾರವಾಗಿ ರಾಜ್ಯ ಹೈಕೋಟ್ ೯ನ ಬೆಂಗಳೂರು, ಧಾರವಾಡ ಮತ್ತು ಕಲಬುರಗಿ ಪೀಠದಲ್ಲಿ ಪ್ರಕರಣಗಳು ದಾಖಲಾಗಿವೆ.

ಬೆಂಗಳೂರುಪೀಠದಲ್ಲಿ ಯುಜಿಸಿ ನಿಯಮಗಳ ಪ್ರಕಾರ ಅರ್ಹತೆ ಹೊಂದಿರುವವರನ್ನು ನೇಮಕ ಮಾಡಿಕೊಳ್ಳುವಂತೆ ನ್ಯಾಯಾಲಯವು ಅನುಮತಿ ನೀಡಿದ್ದು, ಅರ್ಹ ಅತಿಥಿ ಉಪನ್ಯಾಸಕರು ಲಭ್ಯವಾಗದ ವಿಷಯಗಳಲ್ಲಿ ಸ್ನಾತಕೋತ್ತರ ಪದವಿ ವ್ಯಾಸಂಗ ಮಾಡಿದ್ದು, ಸೇವಾ ಅನುಭವ ಇರುವಂತಹವರನ್ನು ಪರಿಗಣಿಸುವಂತೆ ತಿಳಿಸಿದೆ. ಮತ್ತೊಂದು ಪೀಠವು ಯುಜಿಸಿ ಅರ್ಹತೆ ಇಲ್ಲದಿದ್ದರೂ ಸೇವಾ ಅನುಭವವನ್ನು ಪರಿಗಣಿಸುವಂತೆ ಮಧ್ಯಂತರ ತೀರ್ಪು ನೀಡಿದೆ. ಕಾನೂನು ತೊಡಕಿನಿಂದ ಸರ್ಕಾರವು ಇಕ್ಕಟ್ಟಿಗೆ ಸಿಲುಕಿದೆ. ಇತ್ತ ನೇಮಕಾತಿ ಮಾಡಿಕೊಳ್ಳುವಂತೆಯೂ ಇಲ್ಲ.

ಸುಮ್ಮನಿರುವಂತೆಯೂ ಇಲ್ಲದಂತಾಗಿದೆ. 3,800 ಮಂದಿ ಅಪೀಲ್: ರಾಜ್ಯದ ಮೂರು ಪೀಠದಲ್ಲಿ ಅಪೀಲ್ ಹೋಗಿರುವವರಲ್ಲಿ 3,800 ಮಂದಿ ಯುಜಿಸಿ ಅನರ್ಹತೆ ಹೊಂದಿರುವವರೇ ಇದ್ದಾರೆ. ತ್ವರಿತವಾಗಿ ಪ್ರಕರಣ ಇತ್ಯರ್ಥವಾಗದ ಪರಿಣಾಮ, ನೇಮಕಾತಿ ನಡೆಯುತ್ತಿಲ್ಲ. ಅಂತಿಮವಾಗಿ ವಿದ್ಯಾರ್ಥಿಗಳು ಪಾಠ ಪ್ರವಚನವಿಲ್ಲದೆ, ಸಮಸ್ಯೆ ಅನುಭವಿಸುವಂತಾಗಿದೆ. ಸರ್ಕಾರಿ ಕಾಲೇಜುಗಳ ಗುಣಮಟ್ಟ ಕುಸಿತಕ್ಕೂ ಕಾರಣವಾಗಿದೆ ಎನ್ನುತ್ತಾರೆ ಸರ್ಕಾರಿ ಕಾಲೇಜುಗಳ ಪ್ರಾಂಶುಪಾಲರು.

2024-25ನೇ ಸಾಲಿನಲ್ಲಿ ಒಟ್ಟು 10,500 ಅತಿಥಿ ಉಪನ್ಯಾಸಕರನ್ನು ಸರ್ಕಾರ ನೇಮಕ ಮಾಡಿತ್ತು. ಇವರಲ್ಲಿ ಈ ವರ್ಷ ಅಂದಾಜು 6,500 ಮಂದಿ ಅರ್ಹತೆ ಹೊಂದಿರುವವರಿದ್ದು, ಉಳಿದ 4 ಸಾವಿರ ಮಂದಿ ಅನರ್ಹರಿದ್ದಾರೆ. ಕ್ಯಾನಿನೆಟ್‌ನಲ್ಲಿ ಚರ್ಚೆ?: ಸೆ.25ರಂದು ನಡೆಯಲಿರುವ ಕ್ಯಾಬಿನೆಟ್ ಸಭೆಯಲ್ಲಿ ಈ ವಿಷಯ ಚರ್ಚಿಸುವ ಸಾಧ್ಯತೆ ಇದೆ.

ವಿಷಯವು ಗಂಭೀರವಾಗಿರುವುದರಿಂದ ಚರ್ಚಿಸಿ ತುರ್ತಾಗಿ ಪರಿಹಾರ ಕಂಡುಕೊಳ್ಳಲು ಮುಂದಾಗಿದೆ.