ಅತಿಥಿ ಉಪನ್ಯಾಸಕರ ನೇಮಕದಲ್ಲಿ ಭಾರೀ ವಿಳಂಬ.

ರಾಜ್ಯದ ಸರಕಾರಿ ಪ್ರಥಮದರ್ಜೆ ಕಾಲೇಜುಗಳ ಅತಿಥಿ ಉಪನ್ಯಾಸಕರ ನೇಮಕ ವಿಚಾರದಲ್ಲಿ ವಿಳಂಬವಾಗಿದ್ದು, ಕಳೆದ ಒಂದು ತಿಂಗಳಿನಿಂದ ಲಕ್ಷಾಂತರ ವಿದ್ಯಾರ್ಥಿಗಳು ಒಂದೆರಡು ಕ್ಲಾಸ್‌ ಕುಳಿತು ವಾಪಸ್‌ ಮರಳುತ್ತಿದ್ದಾರೆ.ಪ್ರಸಕ್ತ ಶೈಕ್ಷಣಿಕ ವರ್ಷದ ಎಲ್ಲಾ ಆರಂಭಿಕ ಸೆಮಿಸ್ಟರ್‌ಗಳ ಪರೀಕ್ಷೆಯನ್ನು ವಿದ್ಯಾರ್ಥಿಗಳು ಪಾಠವಿಲ್ಲದೆ ಎದುರಿಸಬೇಕಾಗುತ್ತಿದೆ.ಡಿಗ್ರಿಗೆ ನಿತ್ಯ ಎರಡೇ ಕ್ಲಾಸ್‌!

ಯುಜಿಸಿ, ನಾನ್ ಯುಜಿಸಿ ಕಾರಣಕೆ ನೇಮಕಾತಿ ವಿಳಂಬ, ಆಗ್ತಿದೆ ಹಾಗೂ ಎಂ ಪಿಲ್ ಆದವರಿಗೆ ಎನ್‌ಇಟಿ, ಕೆ-ಸೆಟ್‌ ತತ್ಸಮಾನವಾಗಿ ಪರಿಗಣಿಸಬೇಕೆಂಬ ಒತ್ತಾಯ ಸೇರಿದಂತೆ ನಾನಾ ಕಾರಣಗಳಿಂದ ಅತಿಥಿ ಉಪನ್ಯಾಸಕರ ನೇಮಕ ತಡವಾಗುತ್ತಿದೆ.

ರಾಜ್ಯದ 432 ಸರಕಾರಿ ಪ್ರಥಮದರ್ಜೆ ಕಾಲೇಜುಗಳಿಂದ 3,500 ಕಾಯಂ ಉಪನ್ಯಾಸಕರು ಸೇವೆ ಸಲ್ಲಿಸುತ್ತಿದ್ದು, ಕಳೆದ ಶೈಕ್ಷಣಿಕ ವರ್ಷದಲ್ಲಿ 10,976 ಅತಿಥಿ ಉಪನ್ಯಾಸಕರ ನೇಮಕವಾಗಿತ್ತು. ಈ ವರ್ಷವೂ ಅದೇ ಪ್ರಮಾಣದ ನೇಮಕದ ಅವಶ್ಯಕತೆ ಇದೆ. ಇನ್ನುಳಿದಂತೆ ನಿವೃತ್ತಿ, ವರ್ಗಾವಣೆಗೊಂಡಿರುವ ಕಾಯಂ ಉಪನ್ಯಾಸಕರ ಲೆಕ್ಕ ಬೇರೆಯಿದ್ದು, ಅದರನುಸಾರ ಅತಿಥಿ ಉಪನ್ಯಾಸಕ ನೇಮಕವಾಗಬೇಕು.

ಕಾಲೇಜುಗಳಲ್ಲಿ ಹೊಸ ಶೈಕ್ಷಣಿಕ ವರ್ಷ ಆರಂಭವಾಗಿ 1 ರಿಂದ 1.5 ತಿಂಗಳು ಕಳೆದಿದೆ. 90 ದಿನ ಅರ್ಥಾತ್‌ ಮೂರು ತಿಂಗಳು ಸೆಮಿಸ್ಟರ್‌ ಅವಧಿ. ಇನ್ನೊಂದು ಒಂದುವರೆ ತಿಂಗಳಲ್ಲಿ ಸೆಮಿಸ್ಟರ್‌ ಮುಕ್ತಾಯವಾಗಲಿದೆ. ಪದವಿ ವಿದ್ಯಾರ್ಥಿಗಳಿಗೆ ಸೆಮಿಸ್ಟರ್‌ ಸಿಲಬಸ್‌ ಮುಗಿಸುವವರು ಯಾರು? ಯಾವಾಗ? ಎನ್ನುವುದೇ ಯಕ್ಷ ಪ್ರಶ್ನೆಯಾಗಿದೆ.


ಅತಿಥಿ ಉಪನ್ಯಾಸಕರ ನೇಮಕ ಮಾಡಿಕೊಳ್ಳಲು ಯುಜಿಸಿ ನಿಯಮ ಪಾಲಿಸಬೇಕೆಂದು ನಿಯಮ ಮಾಡಲಾಗಿದೆ. ಅದರಂತೆ ಉನ್ನತ ಶಿಕ್ಷಣ ಇಲಾಖೆ ಅತಿಥಿ ಉಪನ್ಯಾಸಕರ ನೇಮಕ ಮಾಡಿಕೊಳ್ಳಲು ಆದೇಶ ಹೊರಡಿಸಿದೆ. ಆದರೆ, ಕೆಲವು ಅತಿಥಿ ಶಿಕ್ಷಕರು ನ್ಯಾಯಲಯದ ಮೊರೆ ಹೋದ ಕಾರಣ, ಶಿಕ್ಷಣ ಇಲಾಖೆ ನೇಮಕ ಪ್ರಕ್ರಿಯೆ ಅಲ್ಲಿಗೆ ನಿಲ್ಲಿಸಿದೆ.
ಎಲ್ಲೆಲ್ಲೂ ಪ್ರತಿಭಟನೆ


ತರಗತಿಗಳನ್ನು ಆರಂಭಿಸಬೇಕು ಎಂದು ಆಗ್ರಹಿಸಿ ಬೆಂಗಳೂರು, ಮೈಸೂರು, ಚಿತ್ರದುರ್ಗ, ಧಾರವಾಡ, ಬೆಳಗಾವಿ, ವಿಜಯಪುರ, ರಾಯಚೂರು, ಸಿಂಧನೂರು, ಕೊಪ್ಪಳ, ಗಂಗಾವತಿ, ಬಳ್ಳಾರಿ, ವಿಜಯನಗರ ಸೇರಿ ಇತರೆಡೆ ಸಾವಿರಾರು ವಿದ್ಯಾರ್ಥಿಗಳು ಬೀದಿಗಿಳಿದು ಪ್ರತಿಭಟನೆ ನಡೆಸಿದ್ದಾರೆ. ಸದ್ಯ ವಿದ್ಯಾರ್ಥಿಗಳು ಕಾಲೇಜಿಗೆ ಬರುತ್ತಿರುವುದೇ ಪ್ರತಿಭಟನೆ ಮಾಡಲೆಂದೇ ಎಂಬ ಪರಿಸ್ಥಿತಿ ಎದ್ದು ಕಾಣುತ್ತಿದೆ.
ವಿದ್ಯಾರ್ಥಿಗಳಿಗೆ ಆತಂಕ !

ರಾಜ್ಯದಲ್ಲಿ ಪದವಿ ನಾಲ್ಕು ತಿಂಗಳುಗಳ ಸೆಮಿಸ್ಟರ್‌ ಪದ್ಧತಿ ಜಾರಿಯಲ್ಲಿದ್ದು, ಅದರಲ್ಲಿಕ ಡ್ಡಾಯವಾಗಿ ಮೂರು ತಿಂಗಳು ತರಗತಿ ನಡೆಯಬೇಕು ಎಂಬ ನಿಯಮವಿದೆ. ಆದರೆ, ಹಲವು ಕಡೆ ಕಳೆದೆರಡೂವರೆ ತಿಂಗಳಿಂದ ಒಂದು ತರಗತಿಯೂ ನಡೆದಿಲ್ಲ. ಮೈಸೂರು, ಬೆಂಗಳೂರು, ಧಾರವಾಡ, ಬೆಳಗಾವಿ ವಿವಿ ವ್ಯಾಪ್ತಿಯಲ್ಲಿ ಎರಡು ತಿಂಗಳ ಹಿಂದೆ ತರಗತಿ ಆರಂಭವಾಗಿದೆ. ಕ್ಲಾಸ್‌ ತೆಗೆದುಕೊಳ್ಳುವವರು ಇಲ್ಲದ ಕಾರಣ ಒಂದೂ ಕ್ಲಾಸ್‌ ಇಲ್ಲದೆ ಸೆಮಿಸ್ಟರ್‌ ಮುಗಿಯುತ್ತದೆಯೇ ಎಂಬ ಆತಂಕ ವಿದ್ಯಾರ್ಥಿಗಳಿಗೆ ಶುರುವಾಗಿದೆ.

ಆದಷ್ಟು ಬೇಗ ಹೊಸದಾಗಿ ಕೌನ್ಸಲಿಂಗ್‌ ನಡೆದು ಅತಿಥಿ ಉಪನ್ಯಾಸಕರ ನೇಮಕವಾಗಬೇಕು. ಯುಜಿಸಿ,ಯುಜಿಸಿಯೇತರು ಎಂಬ ಬೇಧ-ಭಾವ ಮಾಡದೆ ನಾನಾ ವರ್ಷಗಳಿಂದ ಸೇವೆ ಸಲ್ಲಿಸಿರುವವರನ್ನು ನೇಮಕಾತಿಯಲ್ಲಿ ಮೊದಲ ಆದ್ಯತೆ ಮೇರೆಗೆ ಪರಿಗಣಿಸಬೇಕು ಎಂದು ರಾಜ್ಯ ಸರಕಾರಿ ಪದವಿ ಕಾಲೇಜುಗಳ ಅತಿಥಿ ಉಪನ್ಯಾಸಕರ ಸಂಘದ ಅಧ್ಯಕ್ಷ ಡಾ. ಹನುಮಂತಗೌಡ ಆರ್‌. ಕಲ್ಮನಿ ಆಗ್ರಹಿಸಿದ್ದಾರೆ.

ಪೂರಕ ಮಾಹಿತಿ: ಶಶಿಧರ್‌ ಎಸ್‌.ದೋಣಿಹಕ್ಲು, ತುಮಕೂರು; ಬ್ರಹ್ಮಾನಂದ ಎ.ನಿಡಗುಂದಾ ಕಲಬುರಗಿ; ರವೀಂದ್ರ ತೆಳಗಡೆ ಬಳ್ಳಾರಿ.