ಸರ್ಕಾರಿ ಶಾಲೆಗಳಲ್ಲಿ ತಾಲೂಕಲ್ಲಿ ಅತಿಥಿ ಶಿಕ್ಷಕರೇ ಉತ್ಸೂವಾರಿ.

ದೇವದುರ್ಗ.01.ಅಕ್ಟೋಬರ.25:- ರಾಜ್ಯದ ಸರಕಾರಿ ಪ್ರಾಥಮಿಕ ಹಾಗೂ ಪ್ರೌಢ ಶಾಲೆಗಳಲ್ಲಿ ಶಿಕ್ಷಕರ ಕೊರತೆ ಹಿನ್ನೆಲೆಯಲ್ಲಿ ಅತಿಥಿ ಶಿಕ್ಷಕರೇ ಆಸರೆ ಎಂಬಂತಾಗಿದೆ. 25 ಕ್ಲಸ್ಟರ್‌ನಲ್ಲಿ 17 ಕ್ಲಸ್ಟರ್‌ಹುದ್ದೆಗಳು ಖಾಲಿ ಇದ್ದು, ಅವಧಿ ಮುಗಿದ ಸಿಆರ್‌ಪಿಗಳಿಗೆ ಆರೇಳು ತಿಂಗಳಿಂದ ಶಾಲೆಗಳ ನಿರ್ವಹಣೆ ಜವಬ್ದಾರಿ ವಹಿಸಲಾಗಿದೆ.

ಭಾರವಾದರೂ ಕರ್ತವ್ಯ ನಿರ್ವಹಿಸಲಾಗುತ್ತಿದೆ. ಕಾಲಮಿತಿಯಲ್ಲಿ ಹಲವು ಮಾಹಿತಿಗೆ ಅಲೆದಾಡುವಂತಿದೆ. ಶಿಕ್ಷಕರ ಕೊರತೆಯಿಂದ ಅತಿಥಿ ಶಿಕ್ಷಕರಿಂದಲೇ ಸರಕಾರಿ ಶಾಲೆಗಳು ನಡೆಯುತ್ತಿರುವುದರಿಂದ ನಿರ್ವಹಣೆ ಭಾರ ಎನಿಸಿದೆ. ದಿನಕ್ಕೊಂದು ಮಾಹಿತಿ ಕೇಳುತ್ತಿರುವ ಅಧಿಕಾರಿಗಳ ನಡೆಯಿಂದ ಬಹುತೇಕ ಸಿಆರ್‌ಪಿಗಳು ಆಪ್ತ ಶಿಕ್ಷಕರ ಮುಂದೆ ಅಳಲು ತೋಡಿಕೊಂಡಿದ್ದಾರೆ. ಮೂರು ವರ್ಷಗಳ ಕಾಲ ಹುದ್ದೆಗಳನ್ನು ನಿರ್ವಹಿಸಿದ ಸಿಆರ್‌ಪಿಗಳಿಗೆ ಹೆಚ್ಚುವರಿ ನಿರ್ವಹಣೆ ಸಾಕಾಗಿದೆ ಎನ್ನಲಾಗುತ್ತಿದೆ.

ಹುದ್ದೆಗಳು ಖಾಲಿ ಖಾಲಿ: ಪ್ರಾಥಮಿಕ ಶಾಲೆಯಲ್ಲಿ1656 ಮಂಜೂರು ಹುದ್ದೆಗಳಿದ್ದು, ಅದರಲ್ಲಿ 606 ಶಿಕ್ಷಕರು ಕಾರ್ಯ ನಿರ್ವಹಿಸುತ್ತಿದ್ದಾರೆ. 1050 ಶಿಕ್ಷಕರ ಹುದ್ದೆಗಳು ಖಾಲಿ ಇವೆ. ಪ್ರೌಢ ಶಾಲೆಯಲ್ಲಿ 363 ಮಂಜೂರು ಹುದ್ದೆಗಳಿದ್ದು, 137 ಶಿಕ್ಷಕರು ಕಾರ್ಯ ನಿರ್ವಹಿಸುತ್ತಿದ್ದಾರೆ. 226 ಹುದ್ದೆಗಳು ಖಾಲಿ ಇವೆ. ಈವರ್ಷ ಶಿಕ್ಷಕರ ಕೊರತೆ ಇರುವ ಶಾಲೆಗಳಿಗೆ 768 ಅತಿಥಿ ಶಿಕ್ಷಕರನ್ನು ನೇಮಿಸಲಾಗಿದೆ.

351 ಸರಕಾರಿ ಶಾಲೆಗಳು: ಪ್ರಾಥಮಿಕ ಮತ್ತು ಪ್ರೌಢ ಶಾಲೆ ಸೇರಿದಂತೆ ಒಟ್ಟು 351 ಸರಕಾರಿ ಶಾಲೆಗಳು ತಾಲೂಕಿನಲ್ಲಿ ಕಾರ್ಯ ನಿರ್ವಹಿಸುತ್ತಿವೆ. ಕಳೆದ ವರ್ಷ ಬಹುತೇಕ ಸರಕಾರಿ ಶಾಲೆಗಳಲ್ಲಿ ಶಿಕ್ಷಕರ ಕೊರತೆ ಸಮಸ್ಯೆ ಇದೆ. ಕಚೇರಿ ನಿರ್ವಹಣೆ ಜತೆ ಶಾಲೆಗಳ ಜವಾಬ್ದಾರಿ ಎದುರಿಸುವಂತಾಗಿದೆ.

17 ಕ್ಲಸ್ಟರ್‌ಸಿಆರ್‌ಪಿ ಖಾಲಿ: ಪಟ್ಟಣ ಸೇರಿದಂತೆ ತಾಲೂಕಿನಲ್ಲಿ 25 ಕ್ಲಸ್ಟರ್‌ಗಳು ಇದ್ದು, 17 ಕ್ಲಸ್ಟರ್‌ ಸಿಆರ್‌ಪಿಗಳ ಹುದ್ದೆಗಳು ಖಾಲಿ ಹಿನ್ನೆಲೆಯಲ್ಲಿ ಈ ಹಿಂದೆ ಸಿಆರ್‌ಪಿ ಹುದ್ದೆಗಳು ನಿರ್ವಹಿಸಿದವರಿಗೆ ಹೆಚ್ಚುವರಿಯಾಗಿ ಕರ್ತವ್ಯ ನಿರ್ವಹಿಸಲು ಆದೇಶಿಸಿದೆ. ಕುಡಿಯುವ ನೀರು, ಶೌಚಾಲಯ, ಆಟದ ಮೈದಾನ ವಿದ್ಯುತ್‌, ಶಿಕ್ಷಕರ ಸಮಸ್ಯೆ ಸೇರಿದಂತೆ ಹಲವು ಸಮಸ್ಯೆಗಳ ಮಧ್ಯೆಯೇ ಕ್ಲಸ್ಟರ್‌ಗಳು ನಿರ್ವಹಣೆ ಸಿಆರ್‌ಪಿಗಳಿಗೆ ಭಾರ ಎನಿಸಿದೆ.

ಪ್ರಾಥಮಿಕ ಮತ್ತು ಪ್ರೌಢ ಶಾಲೆಯಲ್ಲಿ ಶಿಕ್ಷಕರ ಕೊರತೆ ಹಿನ್ನೆಲೆ ಅತಿಥಿ ಶಿಕ್ಷಕರನ್ನು ನೇಮಿಸಲಾಗಿದೆ. ಹದಿನೇಳು ಕ್ಲಸ್ಟರ್‌ನಲ್ಲಿ ಸಿಆರ್‌ಪಿಗಳ ಹುದ್ದೆಗಳು ಖಾಲಿ ಇದ್ದು, ಅವಧಿ ಮುಗಿದವರಿಗೆ ಹೆಚ್ಚುವರಿಯಾಗಿ ಜವಬ್ದಾರಿ ನೀಡಲಾಗಿದೆ. -ಪಿ.ಮಹಾದೇವಯ್ಯ, ಕ್ಷೇತ್ರ ಶಿಕ್ಷಣಾಧಿಕಾರಿ, ದೇವದುರ್ಗ.

ಸರಕಾರಿ ಶಾಲೆಯಲ್ಲಿ ಶಿಕ್ಷಕರ ಕೊರತೆ ಹಿನ್ನೆಲೆ ಬಡಮಕ್ಕಳಿಗೆ ಗುಣಮಟ್ಟದ ಶಿಕ್ಷಣ ಸೌಲಭ್ಯ ಸಿಗುತ್ತಿಲ್ಲ. ಅತಿಥಿ ಶಿಕ್ಷಕರ ಮೇಲೆ ಶಾಲೆಗಳು ನಡೆಯುತ್ತಿವೆ. ಕುಡಿವ ನೀರು, ಶೌಚಾಲಯ ಸೇರಿ ಮೂಲಭೂತ ಸೌಲಭ್ಯಗಳು ಕೊರತೆ ಎದುರಾಗಿದೆ. -ಮಹಾಲಿಂಗ ದೊಡ್ಡಮನಿ, ಎಸ್‌ಎಫ್‌ಐ ಸಂಘಟನೆ ತಾಲೂಕಾಧ್ಯಕ್ಷ