ಸರ್ಕಾರಿ ಪದವಿ ಕಾಲೇಜುಗಳಲ್ಲಿ ಅತಿಥಿ ಉಪನ್ಯಾಸಕರ ನೇಮಕ ತಡ ಏಕೆ?

ಬೆಂಗಳೂರು.24.ಆಗಸ್ಟ್.25:- ರಾಜ್ಯಾದ್ಯಂತ ಅತಿಥಿ ಉಪನ್ಯಾಸಕರ ನೇಮಕಾತಿಗೆ ಕಗ್ಗಂಟು ಸರಕಾರಿ ಕಾಲೇಜುಗಳಲ್ಲಿ ವಿದ್ಯಾರ್ಥಿಗಳ ಸಂಖ್ಯೆ ಬಹಳಷ್ಟು ಕುಸಿಯುತ್ತಿದೆ ಎಂಬ ಕೂಗು ಸಾರ್ವತ್ರಿಕವಾಗುತ್ತಿರುವಾಗಲೇ ಅಲ್ಲಿ ಸದ್ಯ ಉಪನ್ಯಾಸಕರ ಕೊರತೆಯಿಂದ ಪಾಠ, ಪ್ರವಚನ ಬಹುತೇಕ ಸ್ತಬ್ಧವಾಗಿದೆ.

ರಾಜ್ಯಾದ್ಯಂತ ಸರಕಾರಿ ಕಾಲೇಜುಗಳಲ್ಲಿ ಸುಮಾರು ಶೇ.40ರಷ್ಟು ಮಾತ್ರ ಖಾಯಂ ಉಪನ್ಯಾಸಕರಿದ್ದರೆ, ಉಳಿದ ಸುಮಾರು ಶೇ. 60ರಷ್ಟು ಅತಿಥಿ ಉಪನ್ಯಾಸಕರನ್ನೇ ನೆಚ್ಚಿಕೊಳ್ಳಬೇಕಾಗುತ್ತದೆ. ರಾಜ್ಯದ ಎಲ್ಲ ವಿ.ವಿ. ವ್ಯಾಪ್ತಿಯ ಸರಕಾರಿ ಕಾಲೇಜುಗಳಲ್ಲಿ ಸದ್ಯ ತರಗತಿ ಆರಂಭವಾಗಿ ಹಲವು ದಿನಗಳು ಕಳೆದಿದ್ದರೂ ಅತಿಥಿ ಉಪನ್ಯಾಸಕರ ನೇಮಕ ಮಾತ್ರ ಇನ್ನೂ ಆಗಿಲ್ಲ. ಹೀಗಾಗಿ ಖಾಯಂ ಉಪನ್ಯಾಸಕರು ಮಾತ್ರ ಪಾಠ ಮಾಡುತ್ತಿದ್ದು, ಉಳಿದ ತರಗತಿಗಳು ಅತಿಥಿ ಉಪನ್ಯಾಸಕರಿಲ್ಲದೆ ನಡೆಯುತ್ತಿಲ್ಲ. ಇದರಿಂದ ವಿದ್ಯಾರ್ಥಿಗಳು ಪ್ರತೀ ದಿನ ತರಗತಿ ನಷ್ಟದೊಂದಿಗೆ ವಾಪಸ್‌ ಹೋಗುವ ಸ್ಥಿತಿ ರಾಜ್ಯಾದ್ಯಂತ ಸೃಷ್ಟಿಯಾಗಿದೆ. ಸರಕಾರ ಹಾಗೂ ಕಾಲೇಜು ಶಿಕ್ಷಣ ಇಲಾಖೆಗೆ ಪ್ರತೀ ವರ್ಷ ಎದುರಾಗುವ ಈ ಸಮಸ್ಯೆ ಈ ಬಾರಿಯೂ ಕಾಡಿದ್ದು, ಮಕ್ಕಳು ಮಾತ್ರ ಹೈರಾಣಾಗುವಂತಾಗಿದೆ.

ತಡ ಏಕೆ?
ಯುಜಿಸಿ ಮಾನದಂಡದ ಅನ್ವಯ ನೆಟ್‌, ಸೆಟ್‌, ಪಿಎಚ್‌ಡಿ ಅರ್ಹತೆ ಹೊಂದಿದವರು ಮಾತ್ರ ಅತಿಥಿ ಉಪನ್ಯಾಸಕರಾಗಿ ಸೇವೆ ಸಲ್ಲಿಸಲು ಅವಕಾಶ ಎಂದು ಹೈಕೋರ್ಟ್‌ ಆದೇಶದಂತೆ ಕೌನ್ಸೆಲಿಂಗ್‌ ಮಾಡಲು ಇಲಾಖೆ ಈ ಹಿಂದೆ ನಿರ್ಧರಿಸಿತ್ತು. ಆದರೆ 15ರಿಂದ 20 ವರ್ಷ ಸೇವೆ ಸಲ್ಲಿಸಿದ, ಯುಜಿಸಿ ಅರ್ಹತೆ ಹೊಂದದೆ ಇರುವ ಅತಿಥಿ ಉಪನ್ಯಾಸಕರ ಉದ್ಯೋಗಕ್ಕೆ ಕುತ್ತು ಬರಲಿದೆ ಎಂಬ ಕಾರಣದಿಂದ ಇಲಾಖೆಯ ಕ್ರಮದ ವಿರುದ್ಧ ಕೆಲವರು ಹೈಕೋರ್ಟ್‌ಗೆ ರಿಟ್‌ ಅರ್ಜಿ ಸಲ್ಲಿಸಿದ್ದಾರೆ. ಇದು ವಿಚಾರಣ ಹಂತದಲ್ಲಿ ಇದೆ. ಒಂದೆಡೆ ಯುಜಿಸಿ ಅರ್ಹತೆ ಪಡೆದವರ ಹೋರಾಟವಾದರೆ, ಇನ್ನೊಂದೆಡೆ ಸುದೀರ್ಘ‌ ವರ್ಷದ ಅನುಭವ ಹೊಂದಿರುವ ಯುಜಿಸಿ ಅರ್ಹತೆ ಹೊಂದಿಲ್ಲದವರ ಹೋರಾಟದ ಮಧ್ಯೆ ಅತಿಥಿ ಉಪನ್ಯಾಸಕರ ನೇಮಕ ಈಗ ಕಗ್ಗಂಟಾಗಿದೆ.

ಈಗ ಲೆಕ್ಕ ಕೇಳಿದ ಇಲಾಖೆ
ಮಂಗಳೂರಿನ ಸರಕಾರಿ ಕಾಲೇಜಿನ ಪ್ರಾಂಶುಪಾಲರು “ಉದಯವಾಣಿ’ಗೆ ಪ್ರತಿಕ್ರಿಯಿಸಿ, ಪ್ರತೀ ಸರಕಾರಿ ಕಾಲೇಜಿಗೆ ಎಷ್ಟು ಉಪನ್ಯಾಸಕರು ಬೇಕು ಎಂಬ ಬಗ್ಗೆ ಕಾಲೇಜು ಶಿಕ್ಷಣ ಇಲಾಖೆ ಶುಕ್ರವಾರ ವಿವರ ಕೇಳಿದೆ. ಆ. 26ರ ಒಳಗೆ ನೀಡುವಂತೆ ತಿಳಿಸಲಾಗಿದೆ. ಅದಾದ ಬಳಿಕ ನೇಮಕ ಪ್ರಕ್ರಿಯೆ ಆಗಬಹುದು. ನ್ಯಾಯಾಲಯದ ಆದೇಶವೂ ಆಗ ಬಂದರೆ ಅದಕ್ಕೆ ಇನ್ನೆಷ್ಟು ಸಮಯ ಬೇಕು ಗೊತ್ತಿಲ್ಲ ಎಂದಿದ್ದಾರೆ.

20 ದಿನಗಳಿಂದ ಪಾಠ ಪರದಾಟ
ಮಂಗಳೂರು ವಿ.ವಿ. ವ್ಯಾಪ್ತಿಯಲ್ಲಿ ಜು. 25ರಿಂದ ತರಗತಿಗಳು ಆರಂಭವಾಗಿವೆ. ರಾಜ್ಯದ ಹೆಚ್ಚಿನ ವಿ.ವಿ. ವ್ಯಾಪ್ತಿಯ ಕಾಲೇಜುಗಳಲ್ಲಿ ತರಗತಿಗಳು ಹೆಚ್ಚು ಕಡಿಮೆ ಇದೇ ಸಮಯಕ್ಕೆ ಆರಂಭವಾಗಿವೆ. ಕಳೆದ ಬಾರಿಯ ಅತಿಥಿ ಉಪನ್ಯಾಸಕರನ್ನು ಆ. 2ರಂದು 10 ತಿಂಗಳ ನೇಮಕಾತಿ ಅವಧಿಯ ಅನಂತರ ಬಿಡುಗಡೆ ಮಾಡಲಾಗಿದೆ. ಹೀಗಾಗಿ ಆ. 2ರ ಅನಂತರ ಪಾಠ ಪ್ರವಚನ ಸರಿಯಾಗಿ ನಡೆಯುತ್ತಿಲ್ಲ.

ಕಾಲೇಜುಗಳಿಗೆ ಅತಿಥಿ ಉಪನ್ಯಾಸಕರ ನೇಮಕದ ಬಗ್ಗೆ ಕೇಂದ್ರ ಕಚೇರಿಯಿಂದ ಆದೇಶ ಬಂದಿಲ್ಲ. ಕಾಲೇಜುಗಳಲ್ಲಿ ಕಾರ್ಯ ಒತ್ತಡದ ವಿವರವನ್ನು ಸದ್ಯ ಪಡೆದುಕೊಳ್ಳಲಾಗುತ್ತಿದೆ. ಸದ್ಯದಲ್ಲೇ ನೇಮಕದ ಕುರಿತು ಸರಕಾರದಿಂದ ಆದೇಶ ಬರಲಿದೆ ಎಂಬ ಮಾಹಿತಿ ಇದೆ. ಅಲ್ಲಿಯವರೆಗೆ ಕಾಲೇಜುಗಳಲ್ಲಿ ಖಾಯಂ ಉಪನ್ಯಾಸಕರೇ ನಿರ್ವಹಣೆ ಮಾಡಲಿದ್ದಾರೆ.
– ಡಾ.ಕವಿತಾ, ಪ್ರಾದೇಶಿಕ ಜಂಟಿ ನಿರ್ದೇಶಕರು, ಕಾಲೇಜು ಶಿಕ್ಷಣ ಇಲಾಖೆ-ಮಂಗಳೂರು