ರಾಯಚೂರಿಗೆ ಮರಳಿ ಬರುತ್ತೇನೆ ಎಂದ ಉಪ ಲೋಕಾಯುಕ್ತರಾದ ಬಿ.ವೀರಪ್ಪ

ಕೊನೆಯ ದಿನ ಸಂಜೆವರೆಗೂ ಅರ್ಜಿ ಹಿಡಿದು ಓಡೋಡಿ ಬಂದ ಅಹವಾಲುದಾರರು.

ಹಾಸನ ರೈಲು ಮೂಲಕ ಬೆಂಗಳೂರಿಗೆ ಪ್ರಯಾಣ ಬೆಳೆಸಿದ ಉಪ ಲೋಕಾಯುಕ್ತರು

ವೇದಿಕೆಯಿಂದ ನಿರ್ಗಮಿಸುವಾಗಲು ಅಹವಾಲು
ಅರ್ಜಿಗಳ ಸ್ವೀಕರಿಸಿದ ಉಪ ಲೋಕಾಯುಕ್ತರು

ರಾಯಚೂರು01.ಸೆಪ್ಟೆಂಬರ್.25: ಉಪ ಲೋಕಾಯುಕ್ತರಾದ ನ್ಯಾಯಮೂರ್ತಿ ಬಿ ವೀರಪ್ಪ ಅವರು ಆಗಸ್ಟ್ 30ರಂದು ಸಂಜೆ, ಬಾಕಿ ಅರ್ಜಿಗಳ ವಿಚಾರಣೆ ಕಾರ್ಯಕ್ರಮ ಮುಕ್ತಾಯಗೊಳಿಸಿ, ವೇದಿಕೆಯಿಂದ ನಿರ್ಗಮಿಸುವ ಸಮಯದವರೆಗೂ ಅಹವಾಲುದಾರರಿಂದ ದೂರು ಅರ್ಜಿ ಸ್ವೀಕರಿಸಿದರು.

ಮಧ್ಯಾಹ್ನ ಊಟದ ವಿರಾಮದ ನಂತರ ಮತ್ತೆ ವೇದಿಕೆಯತ್ತ ಆಗಮಿಸಿ ಬಾಕಿ ಅರ್ಜಿಗಳ ವಿಚಾರಣೆಯನ್ನು ಉಪ ಲೋಕಾಯುಕ್ತರು ಸಂಜೆ 7.15ರವರೆಗೆ ಮುಂದುವರೆಸಿದರು. ಇದೆ ವೇಳೆ, ಮೂರು ದಿನದ ತಮ್ಮ ಪ್ರವಾಸ ಕಾರ್ಯಕ್ರಮಗಳ ಬಗ್ಗೆ ಉಪ ಲೋಕಾಯುಕ್ತರು ಸುದ್ದಿಗಾರರಿಗೆ ಮಾಹಿತಿ ನೀಡಿದರು.

ರಾಯಚೂರು ಜಿಲ್ಲೆಯ ಪ್ರವಾಸದಿಂದಾಗಿ ಈ ಭಾಗದ ಜನರಿಗೆ ಅನುಕೂಲವಾಗಿದೆ ಎಂದು ಭಾವಿಸಿದ್ದೇನೆ. ರಾಜ್ಯದ ಬೇರೆ ಬೇರೆ ಜಿಲ್ಲೆಗಳಿಗೆ ಹೋಲಿಸಿದರೆ ರಾಯಚೂರು ಜಿಲ್ಲೆಯಲ್ಲಿ ಅತಿ ಹೆಚ್ಚಿನ ಸಂಖ್ಯೆಯಲ್ಲಿ ದೂರು ಅರ್ಜಿಗಳು ಬಂದಿವೆ. ಕೆಲವು ಅರ್ಜಿಗಳನ್ನು ಸ್ಥಳದಲ್ಲೇ ವಿಲೇ ಮಾಡಿದ್ದೇವೆ. ಬಾಕಿ ಅರ್ಜಿಗಳನ್ನು ನಿಯಮಾನುಸಾರ ಪರಿಶೀಲಿಸುತ್ತೇವೆ. ‘ದುಷ್ಟರ ಸಂಹಾರವೇ ನನ್ನ ಗುರಿ’ ಎಂಬುದಕ್ಕೆ ನಾನು ಸದಾ ಬದ್ಧನಾಗಿ ಕೆಲಸ ಮಾಡುತ್ತೇನೆ. ರಾಯಚೂರು ಜಿಲ್ಲೆಗೆ ಮತ್ತೆ ಮರಳಿ ಬರುತ್ತೇನೆ ಎಂದು ಇದೆ ವೇಳೆ ಉಪ ಲೋಕಾಯುಕ್ತರು ತಿಳಿಸಿದರು.

ತಮ್ಮ ಪ್ರವಾಸ ಕಾರ್ಯಕ್ರಮಕ್ಕೆ ನಿಮ್ಮೆಲ್ಲರಿಂದಲೂ ಉತ್ತಮ ಸಹಕಾರ ಸಿಕ್ಕಿದೆ. ನನಗೆ ಸಂತೋಷವಾಗಿದೆ ಎಂದು ತಿಳಿಸಿ ಉಪ ಲೋಕಾಯುಕ್ತರು ವೇದಿಕೆಯಿಂದ ನಿರ್ಗಮಿಸುವ ಹೊತ್ತಿಗೆ, ‘ಸರ್ ಸರ್ ನಮ್ಮದೊಂದು ದೂರು ಇದೆ ಎಂದು’ ಐದಾರು ಜನ ಮಹಿಳೆಯರು ವೇದಿಕೆಯ ಮೇಲೇರಿ ಉಪ ಲೋಕಾಯುಕ್ತರ ಬಳಿಗೆ ಬಂದರು.

ಅರ್ಜಿ ಅಹವಾಲು ಸ್ವೀಕಾರ, ದೂರುಗಳ ವಿಚಾರಣೆ ಕಾರ್ಯಕ್ರಮ ಮುಕ್ತಾಯವಾಗಿದೆ. ನೋಂದಣಿ ಇಲ್ಲದೇ ವಿಚಾರಣೆ ನಡೆಸುವುದು ಹೇಗೆ ಎಂದು ಅವರಿಗೆ ತಿಳಿಸಿದಾಗಲು ಅರ್ಜಿದಾರರು ‘ಸರ್ ಸರ್ ನಮಗೆ ನ್ಯಾಯ ಕೊಡಿ’ ಎಂದು ಒತ್ತಾಯ ಮಾಡಿದರು. ಆಗ ಉಪ ಲೋಕಾಯುಕ್ತರು, ‘ಸಾರ್ವಜನಿಕರ ದೂರು ಅರ್ಜಿಗಳ ನೋಂದಣಿ ಸ್ವೀಕಾರಕ್ಕೆ ಸಾಕಷ್ಟು ಸಮಯ ನೀಡಿದ್ದೆವು. ಆಗ ನೀವು ಬಂದಿಲ್ಲ. ಈಗ ಬಂದಿದ್ದೀರಿ.

ಆಯ್ತು ತಾಯಿ ನಿಮ್ಮ ದೂರು ಕೊಡಿ, ನಾನು ನಿಯಮಾನುಸಾರ ಪರಿಶೀಲಿಸುತ್ತೇನೆ’ ಎಂದು ತಿಳಿಸಿ ಅಹವಾಲುದಾರರಿಂದ ದೂರು ಅರ್ಜಿಯನ್ನು ಉಪ ಲೋಕಾಯುಕ್ತರೇ ಖುದ್ದು ಸ್ವೀಕರಿಸಿ ಅರ್ಜಿದಾರರಿಗೆ ಸ್ಪಂದನೆ ನೀಡಿದರು. ಆಗ ಅರ್ಜಿದಾರರು ‘ಧನ್ಯವಾದಗಳು ಸರ್’ ಎಂದು ಉಪ ಲೋಕಾಯುಕ್ತರಿಗೆ ನಮಸ್ಕಾರ ತಿಳಿಸಿದರು. ರಾಷ್ಟçಗೀತೆಯೊಂದಿಗೆ ಉಪ ಲೋಕಾಯುಕ್ತರ ಪ್ರವಾಸ ಕಾರ್ಯಕ್ರಮಕ್ಕೆ ತೆರೆ ಬಿದ್ದಿತು.

ಹೊರಗಡೆ ಎಲ್‌ಇಡಿ ಸ್ಕಿçÃನ್: ಉಪ ಲೋಕಾಯುಕ್ತರ ಅಹವಾಲು ಅರ್ಜಿ ಸ್ವೀಕಾರ ಮತ್ತು ಬಾಕಿ ಅರ್ಜಿಗಳ ವಿಚಾರಣೆಗೆ ಹೆಚ್ಚಿನ ಸಂಖ್ಯೆಯಲ್ಲಿ ಸಾರ್ವಜನಿಕರು ಆಗಮಿಸಿದ್ದರಿಂದ ಅವರಿಗೆ ಅನುಕೂಲವಾಗಲು ಹೊರಗಡೆ ದೊಡ್ಡದಾದ ಎಲ್‌ಇಡಿ ಸ್ಕಿçÃನ್ ಅಳವಡಿಸಿ ಕಾರ್ಯಕ್ರಮದ ವೀಕ್ಷಣೆಗೆ ಅನುಕೂಲ ಕಲ್ಪಿಸಲಾಗಿತ್ತು.

ಕೆಲಸ ಮಾಡಲು ಹುಮ್ಮಸ್ಸು: ಬೆಂಗಳೂರಿನ ಉಪ ಲೋಕಾಯುಕ್ತ ಕಚೇರಿಯ ಅಪರ ನಿಬಂಧಕರು ಆಗಿರುವ ನ್ಯಾಯಾಧೀಶರಾದ ರಮಾಕಾಂತ ಚವ್ಹಾಣ್, ಶಿವಾಜಿ ಅನಂತ ನಲವಾಡೆ, ಉಪ ನಿಬಂಧಕರು ಆಗಿರುವ ನ್ಯಾಯಾಧೀಶರಾದ ಅರವಿಂದ, ರಾಯಚೂರಿನ ಹಿರಿಯ ದಿವಾಣಿ ನ್ಯಾಯಾಧೀಶರಾದ ಹೆಚ್ ಎ ಸಾತ್ವಿಕ್, ರಾಯಚೂರು ಲೋಕಾಯುಕ್ತ ಪೊಲೀಸ್ ಅಧೀಕ್ಷಕರಾದ ಸತೀಶ್ ಬಿ.ಚಿಟುಗುಬ್ಬಿ, ಲೋಕಾಯುಕ್ತ ಡಿಎಸ್ಪಿಗಳಾದ ರವಿ ಪರುಷೋತ್ತಮ ಮತ್ತು ವಸಂತಕುಮಾರ ಅವರು ಮತ್ತು ಲೋಕಾಯುಕ್ತ ಕಚೇರಿಯ ಪೊಲೀಸ್ ನಿರೀಕ್ಷಕರು ಹಾಗೂ ಬೆಂಗಳೂರು ಮತ್ತು ರಾಯಚೂರು ಲೋಕಾಯುಕ್ತ ಕಚೇರಿಯ ಎಲ್ಲ ಸಿಬ್ಬಂದಿ ಜೊತೆಗಿದ್ದು ಪ್ರವಾಸ ಕಾರ್ಯಕ್ರಮ ಯಶಗೊಳಿಸಿದ್ದಾರೆ. ಅವರ ಸಹಕಾರದಿಂದ ಮತ್ತಷ್ಟು ಕೆಲಸ ಮಾಡುವ ಹುಮ್ಮಸ್ಸು ಬಂದಿದೆ ಎಂದು ಉಪ ಲೋಕಾಯುಕ್ತರಾದ ಬಿ ವೀರಪ್ಪ ಅವರು ಸುದ್ದಿಗಾರರಿಗೆ ತಿಳಿಸಿದರು.

ರೈಲು ಮೂಲಕ ನಿರ್ಗಮನ: ಕೃಷಿ ವಿಜ್ಞಾನಗಳ ವಿಶ್ವವಿದ್ಯಾಲಯದ ಹೊಸ ಅತಿಥಿಗೃಹದಲ್ಲಿ ಮೂರು ದಿನಗಳ ಕಾಲ ವಾಸ್ತವ್ಯ ಮಾಡಿದ್ದ ಉಪ ಲೋಕಾಯುಕ್ತರಾದ ಬಿ ವೀರಪ್ಪ ಅವರು ಕೊನೆಯ ದಿನ ಕಾರ್ಯಕ್ರಮದ ಮುಕ್ತಾಯದ ಬಳಿಕ ಅಧಿಕಾರಿಗಳು ಮತ್ತು ಸಿಬ್ಬಂದಿಯೊAದಿಗೆ ಊಟ ಮುಗಿಸಿ, ಕೃಷಿ ಆವರಣದಿಂದ ನಿರ್ಗಮಿಸಿ ರಾತ್ರಿ 10.30ರ ವೇಳೆಗೆ ರಾಯಚೂರು ರೈಲು ನಿಲ್ದಾಣಕ್ಕೆ ಆಗಮಿಸಿದರು.

ರಾತ್ರಿ 11.15ರ ಸುಮಾರಿಗೆ ಆಗಮಿಸಿದ ಹಾಸನ ರೈಲು ಮೂಲಕ ಉಪ ಲೋಕಾಯುಕ್ತರು ಬೆಂಗಳೂರಿಗೆ ಪ್ರಯಾಣ ಬೆಳೆಸಿದರು. ನ್ಯಾಯಾಧೀಶರಾದ ರಮಾಕಾಂತ ಚವ್ಹಾಣ್, ಶಿವಾಜಿ ಅನಂತ ನಲವಾಡೆ, ಅರವಿಂದ ಅವರು ಸಹ ಉಪ ಲೋಕಾಯುಕ್ತರೊಂದಿಗೆ ಬೆಂಗಳೂರಿಗೆ ತೆರಳಿದರು.

ಅಪರ ಜಿಲ್ಲಾಧಿಕಾರಿಗಳಾದ ಶಿವಾನಂದ ಭಜಂತ್ರಿ, ರಾಯಚೂರು ಲೋಕಾಯುಕ್ತ ಪೊಲೀಸ್ ಅಧೀಕ್ಷಕರಾದ ಸತೀಶ್ ಬಿ.ಚಿಟುಗುಬ್ಬಿ, ಲೋಕಾಯುಕ್ತ ಡಿಎಸ್ಪಿಗಳಾದ ರವಿ ಪರುಷೋತ್ತಮ, ವಸಂತಕುಮಾರ, ತಹಸೀಲ್ದಾರ ಸುರೇಶ ವರ್ಮಾ ಹಾಗೂ ಲೋಕಾಯುಕ್ತ ಕಚೇರಿಯ ಪೊಲೀಸ್ ನಿರೀಕ್ಷಕರು ಸೇರಿದಂತೆ ವಿವಿಧ ಇಲಾಖೆಯ ಅಧಿಕಾರಿಗಳು ಮತ್ತು ಸಿಬ್ಬಂದಿ ಉಪ ಲೋಕಾಯುಕ್ತರಿಗೆ ಬೀಳ್ಕೊಟ್ಟರು.