ಮಾನವೀಯ ಮೌಲ್ಯ ಮೈಗೂಡಿಸಿಕೊಳ್ಳದಿದ್ದಲ್ಲಿ ಯಾವ
ಪದವಿ ಗಳಿಸಿದರೂ ವ್ಯರ್ಥ-ಪ್ರೋ.ಜಗನ್ನಾಥ ಹೆಬ್ಬಾಳೆ

ಬೀದರ.01.ಜುಲೈ.25:- ಮಾನವೀಯ ಮೌಲ್ಯಗಳನ್ನು ಮೈಗೂಡಿಸಿಕೊಳ್ಳದಿದ್ದಲ್ಲಿ ಯಾವ ಪದವಿ ಗಳಿಸಿದರೂ ವ್ಯರ್ಥ ಬೀದರ ವಿಶ್ವವಿದ್ಯಾಲಯದ ನಿವೃತ್ತ ಡೀನ್ ಪ್ರೋ. ಜಗನ್ನಾಥ ಹೆಬ್ಬಾಳೆ ಅಭಿಪ್ರಾಯ ವ್ಯಕ್ತಪಡಿಸಿದರು.

ಅವರು ಇತ್ತೀಚಿಗೆ ತೋಟಗಾರಿಕೆ ಮಹಾವಿದ್ಯಾಲಯ ಬೀದರನಲ್ಲಿ ಹಮ್ಮಿಕೊಂಡಿದ್ದ 15ನೇ ತೋಟಗಾರಿಕೆ ಮಹಾವಿದ್ಯಾಲಯ ಮತ್ತು ವಸತಿ ನಿಲಯಗಳ ವಾರ್ಷಿಕೋತ್ಸವ ಕಾರ್ಯಕ್ರಮ ಉದ್ಘಾಟಿಸಿ ಮಾತನಾಡಿದರು.
ತೋಟಗಾರಿಕಾ ಪದವಿಯು ಯಾವುದೇ ಪದವಿಗಿಂತ ಕಡಿಮೆ ಇಲ್ಲ, ಇದರಲ್ಲಿ ವಿಪುಲ ಉದ್ಯೋಗಾವಕಾಶಗಳಿದ್ದು, ವಿದ್ಯಾರ್ಥಿಗಳು ತೋಟಗಾರಿಕಾ ಪದವಿಯಲ್ಲಿ ಪಡೆದ ಜ್ಞಾನಾರ್ಜನೆಯು ರೈತರ ಸಹಾಯಕ್ಕಾಗಿ ಸದ್ಭಳಕೆಯಾಗಿ ಹೊರಹೊಮ್ಮಿದಲ್ಲಿ ತಂದೆ-ತಾಯಿ ಮತ್ತು ಗುರುಗಳ ಋಣ ತೀರಿಸಿದಂತಾಗುತ್ತದೆ.

ವಿದ್ಯಾರ್ಥಿಗಳು ಜಾಗೃತೆಯಿಂದ ಸರಿಯಾದ ರೀತಿಯಲ್ಲಿ ಅಭ್ಯಾಸ ಮಾಡಿದಾಗ ಯಶಸ್ಸು ಸಾಧ್ಯವೆಂದು ಹಾಗೂ ಪಠ್ಯಕ್ರಮದ ಜೊತೆಗೆ ಮಾನವೀಯ ಮೌಲ್ಯಗಳ ಕಡೆಕೂಡ ಹೆಚ್ಚು ಗಮನಕೊಡಬೇಕೆಂದರು.

ವಿದ್ಯಾರ್ಥಿಗಳು ಹಾಗೂ ಶಿಕ್ಷಕರು ಬರಿ ಪಠ್ಯಕ್ರಮಕ್ಕೆ ಸೀಮಿತರಾಗದೆ ಸಮಾಜ ಮುಖಿಯಾಗಿ ಕಾರ್ಯನಿರ್ವಹಿಸಿದಲ್ಲಿ ಸಮಾಜ ಮನ್ನಣೆ ನೀಡುತ್ತದೆ. ಶಿಕ್ಷಣ ಅಂದರೆ ಕೇವಲ ಪದವಿ ಪಡೆಯುವುದಷ್ಟೇ ಅಲ್ಲ. ಓದು, ಬರಹ ನಿರಂತರವಾಗಿ ಅಳವಡಿಸಿಕೊಂಡಲ್ಲಿ ಪರಿಪಕತ್ವ ಬರುತ್ತದೆ. ಸರಿಯಾದ ಕೆಲಸವನ್ನು, ಸರಿಯಾದ ಸಮಯದಲ್ಲಿ, ಸರಿಯಾದ ರೀತಿಯಲ್ಲಿ ಮಾಡಿ ಮುಗಿಸಿದ್ದಲ್ಲಿ ಅದು ಯಶಸ್ವಿನ ಭಾಗವೆಂದು ಹೇಳಿದರು.

ಶಿಕ್ಷಣವನ್ನು ಪಡೆಯುವುದು ಬರಿ ಸರ್ಕಾರಿ ನೌಕರಿಗಾಗಿ ಅಲ್ಲ ಅದೊಂದು ಜೀವನವನ್ನು ರೂಪಿಸುತ್ತದೆ. ಪದವಿ ಪಡೆಯುವುದು ಅಂದರೆ ಕೇವಲ ಗೇಟ ಪಾಸ್ ಅಂತ ತಿಳಿದುಕೊಳ್ಳಬೇಕು, ಯಶಸ್ವಿಗಾಗಿ ಮುಂದೆ ಬಹಳ ಪ್ರಯತ್ನ ಮಾಡಬೇಕಾಗುತ್ತದೆ.

ವಿದ್ಯಾರ್ಥಿಗಳು ಕೇವಲ ತೋಟಗಾರಿಕೆಕ್ಷೇತ್ರಕ್ಕೆ ಮಾತ್ರ ಸೀಮಿತರಾಗದೇ, ಐ.ಎ.ಎಸ್. ನಂತಹ ವಿವಿಧ ಸ್ಪರ್ಧಾತ್ಮಕ ಪರೀಕ್ಷೆಗಳಿಗೆ ತಯಾರಿ ನಡೆಸುವ ಮುಖಾಂತರ ಉನ್ನತ ಹುದ್ದೆಯನ್ನು ಪಡೆದು ಯಶಸ್ವಿಯಾಗಿ ಈ ಸಮಾಜಕ್ಕೆ ಉತ್ತಮ ಸೇವೆ ಸಲ್ಲಿಸಿ ಮಾದರಿ ವ್ಯಕ್ತಿಗಳಾಗಬೇಕೆಂದು ಹೇಳಿದರು.

ಬೀದರ ತೋಟಗಾರಿಕೆ ಮಹಾವಿದ್ಯಾಲಯದ ಡೀನ್ ಡಾ. ಎಸ್. ವಿ. ಪಾಟೀಲ ಮಾತನಾಡಿ, ಮಹಾವಿದ್ಯಾಲಯ ಹಾಗೂ ವಸತಿ ನಿಲಯಗಳ ವಾರ್ಷಿಕೋತ್ಸವ ಕಾರ್ಯಕ್ರಮವು ಅತ್ಯಂತ ಮಹತ್ವವುಳ್ಳದೆಂದು ಸ್ನಾತಕ ಪದವಿಧರಾಗುತ್ತಿರುವ ಎಲ್ಲಾ ವಿದ್ಯಾರ್ಥಿಗಳಿಗೆ ಶುಭಾಶಯಗಳನ್ನು ತಿಳಿಸಿದರು.

ತಮ್ಮಲ್ಲಿರುವ ಶಕ್ತಿ ಸಾಮರ್ಥ್ಯವನ್ನು ಸರಿಯಾಗಿ ಸದ್ಭಳಕೆ ಮಾಡಿಕೊಂಡು ದೇಶಕ್ಕೆ ಮತ್ತು ಸಮಾಜಕ್ಕೆ ಒಂದು ಉತ್ತಮ ಕೊಡುಗೆಯನ್ನು ನೀಡಬೇಕು. ಇನ್ನು ಹೆಚ್ಚು ಹೆಚ್ಚಿನ ವಿದ್ಯಾರ್ಥಿಗಳು ಎಸ್.ಆರ್.ಎಫ್.,ಜೆ.ಆರ್.ಎಫ್. ಪದಕಗಳನ್ನು ಪಡೆದುಕೊಳ್ಳುವುದು ಮಾತ್ರವಲ್ಲದೇ, ಸ್ವಾವಲಂಬಿ ಉದ್ಯಮಿಗಳಾಗಬೇಕೆಂದು ಹಾಗೂ ರೈತರಿಗೆ ಅತ್ಯುತ್ತಮ ಸಲಹೆ ಸೂಚನೆಗಳನ್ನು ನೀಡಿ ಈ ನಾಡಿಗೆ ಮತ್ತು ವಿಶ್ವವಿದ್ಯಾಲಯಕ್ಕೆ ಒಳ್ಳೆಯ ಕೀರ್ತಿತರಬೇಕೆಂದು ಸಲಹೆ ನೀಡಿದರು.

ವಾರ್ಷಿಕೋತ್ಸವ ನಿಮಿತ್ತ ಹಮ್ಮಿಕೊಂಡಿರುವ ಕ್ರೀಡಾಕೂಟಗಳಲ್ಲಿ ವಿಜೇತರಾದ ವಿದ್ಯಾರ್ಥಿಗಳಿಗೆ ಪದಕ ಹಾಗೂ ಪ್ರಶಸ್ತಿ ಪತ್ರಗಳನ್ನು ಗಣ್ಯರಿಂದ ವಿತರಿಸಲಾಯಿತು.
ಈ ಸಂದರ್ಭದಲ್ಲಿ ಸಹಾಯಕ ಪ್ರಾಧ್ಯಾಪಕರಾದ ಡಾ.ಪ್ರಸನ್ನ ಎಸ್.ಎಮ್., ಶಿಕ್ಷಕ, ಶಿಕ್ಷಕೇತರ ಸಿಬ್ಬಂದಿಗಳು, ವಿದ್ಯಾರ್ಥಿ ಸಂಘದ ಪ್ರತಿನಿಧಿಗಳಾದ ಮಧು ಸ್ಮೇತಾ, ಅಧ್ಯಕ್ಷರು, ದಿವ್ಯಾ, ಪ್ರಧಾನ ಕಾರ್ಯದರ್ಶಿ, ಪಲ್ಲವಿ, ಕ್ರೀಡಾ ಕಾರ್ಯದರ್ಶಿ, ಸಾಗರ ಪಿ., ಸಾಂಸ್ಕೃತಿಕ ಕಾರ್ಯದರ್ಶಿ, ವಸತಿ ನಿಲಯಗಳ ನಿರ್ವಹಣಾ ಪದಾಧಿಕಾರಿಗಳಾದ ನಿತಿನ್‌ಗೌಡ, ಪ್ರಧಾನ ಕಾರ್ಯದರ್ಶಿ,ಮನೋಜ ಪಾಟೀಲ, ಸಹ ಕಾರ್ಯದರ್ಶಿ, ಭಗವಂತರಾಯ, ಭೋಜನ ಕಾರ್ಯದರ್ಶಿ, ಅಲೋಕ್ ಪಾಟೀಲ್,ಕ್ರೀಡಾ ಕಾರ್ಯದರ್ಶಿ ಹರ್ಷ, ಆರೋಗ್ಯ ಕಾರ್ಯದರ್ಶಿ ಆಯುಷ್, ಸಾಂಸ್ಕೃತಿಕ ಕಾರ್ಯದರ್ಶಿ ಸಿಮ್ರಾನ್, ಪ್ರಧಾನ ಕಾರ್ಯದರ್ಶಿ .ದಿವ್ಯಾ ಉಪ್ಪೆ, ಸಹ ಕಾರ್ಯದರ್ಶಿ ಐಶ್ವರ್ಯ, ಭೋಜನ ಕಾರ್ಯದರ್ಶಿ ಶಿವಬಸಮ್ಮ, ಕ್ರೀಡಾ ಕಾರ್ಯದರ್ಶಿ ಕೀರ್ತಿ., ಆರೋಗ್ಯ ಕಾರ್ಯದರ್ಶಿ ರಂಜಿತಾ ಸೇರಿದಂತೆ ಇತರರು ಉಪಸ್ಥಿತರಿದ್ದರು.