ದೇಶದಲ್ಲಿ ಜಾತಿ ಆಧಾರಿತ ಮೀಸಲಾತಿಯು ರೈಲಿನ ರಿಸರ್ವೇಶನ್ ಬೋಗಿಯಂತಾಗಿದೆ: ಸುಪ್ರೀಂ ಕೋರ್ಟ್ ನ್ಯಾಯಮೂರ್ತಿ ಸೂರ್ಯಕಾಂತ್

ಹೊಸ ದೆಹಲಿ.06.ಮೇ.25:- ದೇಶದಲ್ಲಿ ಜಾತಿ ಆಧಾರಿತ ಮೀಸಲಾತಿಯು ರೈಲಿನ ರಿಸರ್ವೇಶನ್ ಬೋಗಿಯಂತಾಗಿದೆ. ಈ ವಿಭಾಗದೊಳಗೆ ಪ್ರವೇಶಿಸುವ ಜನರು ಇತರರನ್ನು ಒಳಗೆ ಬಿಡಲು ಬಯಸುವುದಿಲ್ಲ ಎಂದು ಸುಪ್ರೀಂ ಕೋರ್ಟ್ ನ್ಯಾಯಮೂರ್ತಿ ಸೂರ್ಯ ಕಾಂತ್ ಹೇಳಿದರು.

ಮಹಾರಾಷ್ಟ್ರದ ಸ್ಥಳೀಯ ಸಂಸ್ಥೆ ಚುನಾವಣೆಯಲ್ಲಿ ಇತರ ಹಿಂದುಳಿದ ವರ್ಗಗಳಿಗೆ (ಒಬಿಸಿ) ಮೀಸಲಾತಿಗೆ ಸಂಬಂಧಿಸಿದ ಪ್ರಕರಣವನ್ನು ವಿಚಾರಣೆ ನಡೆಸುವಾಗ ಈ ಅಭಿಪ್ರಾಯಗಳನ್ನು ಅವರು ವ್ಯಕ್ತಪಡಿಸಿದರು.

ಮಹಾರಾಷ್ಟ್ರದಲ್ಲಿ ಸ್ಥಳೀಯ ಸಂಸ್ಥೆ ಚುನಾವಣೆಗಳು ಕೊನೆಯದಾಗಿ 2016-2017 ರಲ್ಲಿ ನಡೆದಿತ್ತು. ಇತರ ಹಿಂದುಳಿದ ವರ್ಗಗಳ (ಒಬಿಸಿ) ಅಭ್ಯರ್ಥಿಗಳಿಗೆ ಕೋಟಾದ ಮೇಲಿನ ಕಾನೂನು ಹೋರಾಟವೇ ವಿಳಂಬವಾಗಲು ಪ್ರಮುಖ ಕಾರಣ. 2021 ರಲ್ಲಿ, ಸುಪ್ರೀಂ ಕೋರ್ಟ್ ಒಬಿಸಿಗಳಿಗೆ ಶೇಕಡಾ 27 ರಷ್ಟು ಕೋಟಾವನ್ನು ಜಾರಿಗೆ ತರಲು ಮಹಾರಾಷ್ಟ್ರ ಸರ್ಕಾರದ ಸುಗ್ರೀವಾಜ್ಞೆಯನ್ನು ರದ್ದುಗೊಳಿಸಿತು.

ಕ್ಷೇತ್ರ ಪುನರ್ವಿಂಗಡಣೆಯ ಸಮಯದಲ್ಲಿ ಒಬಿಸಿಗಳನ್ನು ಗುರುತಿಸಲಾಗಿದ್ದರೂ, ಮಹಾರಾಷ್ಟ್ರವು ಸ್ಥಳೀಯ ಸಂಸ್ಥೆಗಳ ಚುನಾವಣೆಗೆ ಆ ಅಂಕಿ ಅಂಶಗಳನ್ನು ಬಳಸುತ್ತಿಲ್ಲ ಎಂದು ಅರ್ಜಿದಾರರ ಪರವಾಗಿ ಹಾಜರಾದ ವಕೀಲೆ ಇಂದಿರಾ ಜೈಸಿಂಗ್ ನ್ಯಾಯಾಲಯಕ್ಕೆ ತಿಳಿಸಿದರು. ಸ್ಥಳೀಯ ಸಂಸ್ಥೆಗಳಿಗೆ ಶೀಘ್ರದಲ್ಲೇ ಚುನಾವಣೆಗಳನ್ನು ನಡೆಸುವ ಅಗತ್ಯವನ್ನು ಅವರು ಒತ್ತಿ ಹೇಳಿದರು. ರಾಜ್ಯ ಸರ್ಕಾರವು ತಾವೇ ಆಯ್ಕೆ ಮಾಡಿದ ಅಧಿಕಾರಿಗಳ ಮೂಲಕ ಏಕಪಕ್ಷೀಯವಾಗಿ ಸ್ಥಳೀಯ ಸಂಸ್ಥೆಗಳನ್ನು ನಡೆಸುತ್ತಿದೆ ಎಂದು ಅವರು ಆರೋಪಿಸಿದರು.

ಅರ್ಜಿದಾರರ ಪರವಾಗಿ ಹಾಜರಾದ ಇನ್ನೊಬ್ಬ ವಕೀಲ ಗೋಪಾಲ್ ಶಂಕರನಾರಾಯಣನ್, ಮೀಸಲಾತಿ ಉದ್ದೇಶಕ್ಕಾಗಿ ಒಬಿಸಿಗಳಲ್ಲಿ, ರಾಜಕೀಯವಾಗಿ ಹಿಂದುಳಿದ ಮತ್ತು ಸಾಮಾಜಿಕವಾಗಿ ಹಿಂದುಳಿದ ವರ್ಗಗಳನ್ನು ಗುರುತಿಸಬೇಕು ಎಂದು ನ್ಯಾಯಾಲಯಕ್ಕೆ ತಿಳಿಸಿದರು.

ಈ ಬಗ್ಗೆ ಪ್ರತಿಕ್ರಿಯಿಸಿದ ನ್ಯಾಯಮೂರ್ತಿ ಸೂರ್ಯ ಕಾಂತ್,”ದೇಶದಲ್ಲಿ ಮೀಸಲಾತಿಯು ರೈಲು ಬೋಗಿಯ ರಿಸರ್ವೇಶನ್ ನಂತಾಗಿದೆ. ಬೋಗಿಯ ಒಳಗೆ ಬಂದವರು ಜನರು ಇತರರನ್ನು ಒಳಗೆ ಬರಲು ಬಿಡುವುದಿಲ್ಲ. ಮೀಸಲಾತಿಯು ಒಳಗೊಳ್ಳುವಿಕೆಯ ತತ್ವ.

ಈ ಮೂಲಕ ಸರ್ಕಾರಗಳು ಹೆಚ್ಚಿನ ವರ್ಗಗಳನ್ನು ಗುರುತಿಸುವ ಕರ್ತವ್ಯವನ್ನು ಹೊಂದಿವೆ. ರಾಜಕೀಯವಾಗಿ, ಆರ್ಥಿಕವಾಗಿ ಮತ್ತು ಸಾಮಾಜಿಕವಾಗಿ ವಂಚಿತ ಜನರಿದ್ದಾರೆ. ಅವರು ಮೀಸಲಾತಿಯ ಪ್ರಯೋಜನವನ್ನು ಏಕೆ ಪಡೆಯಬಾರದು? ಕೆಲವೇ ಕುಟುಂಬಗಳು ಮತ್ತು ಸಮುದಾಯಗಳು ಮಾತ್ರ ಏಕೆ ಮೀಸಲಾತಿಯ ಪ್ರಯೋಜನವನ್ನು ಪಡೆಯುತ್ತಿವೆ?”, ಎಂದು ಅವರು ಹೇಳಿದರು.