ಜಾತಿ ಗಣತಿ: ಸಚಿವ ಸಂಪುಟ ಸಭೆಯಲ್ಲಿ ಸಿಟ್ಟಿಗೆದ್ದ ಲಿಂಗಾಯತ ಸಚಿವರು! ತುಂಡು ತುಂಡು ಮಾಡುತ್ತಿರುವಿರೆಂದು ಆಕ್ರೋಶ

ಬೆಂಗಳೂರು.18.ಸೆಪ್ಟೆಂಬರ್.25:- ಇಂದು ರಾಜ್ಯದಲ್ಲಿ ಜಾತಿ ಸಮೀಕ್ಷೆ ಕುರಿತು ಗುರುವಾರ ನಡೆದ ಸಂಪುಟ ಸಭೆಯಲ್ಲಿ ನಡೆಯುವ ಚರ್ಚೆ ಸಂದರ್ಭ ಲಿಂಗಾಯತ ಸಚಿವರು ಸಿಟ್ಟಿಗೆದ್ದು ಮಾತನಾಡಿದರು ಎನ್ನಲಾಗಿದೆ.ಒಂದು ಹಂತದಲ್ಲಿ ಸಿಟ್ಟಿಗೆದ್ದ ಸಚಿವ ಎಂ.ಬಿ.ಪಾಟೀಲ್‌, ಜಾತಿ ಗಣತಿ ಮೂಲಕ ಲಿಂಗಾಯತರನ್ನು ತುಂಡು ತುಂಡು ಮಾಡುತ್ತಿದ್ದೀರಿ.

ಕುಲಶಾಸ್ತ್ರೀಯ ಅಧ್ಯಯನವನ್ನು ಯಾರು ಮಾಡೋದು ಎಂದು ಪ್ರಶ್ನಿಸುತ್ತಾ ಟೇಬಲ್‌ ಗುದ್ದಿ, ಕಾಗದ ಪತ್ರಗಳನ್ನು ತಳ್ಳಿದ್ದಾರೆ ಎಂದು ಗೊತ್ತಾಗಿದೆ. (ಲಿಂಗಾಯತ ಧರ್ಮ ಅಥವಾ ಜಾತಿ?)

ಪಾಟೀಲ್‌ ಮಾತಿನ ವೇಳೆ ಲಿಂಗಾಯತ ಸಮುದಾಯದ ಈಶ್ವರ್‌ ಖಂಡ್ರೆ ಹಾಗೂ ಎಸ್‌.ಎಸ್‌.ಮಲ್ಲಿಕಾರ್ಜುನ್‌ ಅವರೂ ತಮ್ಮ ಆಸನಗಳಿಂದ ಎದ್ದುನಿಂತು ದನಿಗೂಡಿಸಿದ್ದಲ್ಲದೆ, ಏರಿದ ಧ್ವನಿಯಲ್ಲಿ ಮಾತನಾಡಲಾರಂಭಿಸಿದ್ದಾರೆ. ”ಯಾವ ಆಧಾರದ ಮೇಲೆ ಈ ಸಮೀಕ್ಷೆ ಆಗುತ್ತಿದೆ? ಹೊಸ ಜಾತಿಗಳನ್ನು ಏಕೆ ಸೇರಿಸಿದ್ದೀರಿ? ಎಂದು ಖಂಡ್ರೆ ಪ್ರಶ್ನಿಸಿದರೆ, ”ನಮ್ಮ ಜಾತಿ ಯಾವುದು ಗೊತ್ತಾ?,” ಎಂದು ಮಲ್ಲಿಕಾರ್ಜುನ್‌ ಕೋಪದಿಂದ ಪ್ರಶ್ನಿಸಿದ್ದಾರೆ. ಈ ಮೂವರು ಸಚಿವರ ವಾದವನ್ನು ಎಚ್‌.ಕೆ ಪಾಟೀಲ್‌ ಅವರೂ ಸಮರ್ಥಿಸಿ ಸಮೀಕ್ಷೆಯ ರೂಪುರೇಷೆ ಮತ್ತು ಮಾನದಂಡ ಒಪ್ಪುವಂತದ್ದಲ್ಲ ಎಂದು ಹೇಳಿದರು ಎನ್ನಲಾಗಿದೆ.


ಸಮೀಕ್ಷೆ ಉಸಾಬರಿಯೇ ಬೇಡ

ಸಮೀಕ್ಷೆಗೆ 331 ಹೊಸ ಜಾತಿಗಳನ್ನು ಸೃಷ್ಟಿಸಿದ್ದು ಯಾರು? ಏಕೆ? ಹೊಸ ಜಾತಿಗಳನ್ನು ಸೃಷ್ಟಿಸಲು ಅಧಿಕಾರ ಇದೆಯೇ? ಇದರಿಂದ ಲಿಂಗಾಯತ ಮಾತ್ರವಲ್ಲ. ಬೇರೆ ಬೇರೆ ಜಾತಿಗಳಲ್ಲೂಗೊಂದಲಗಳು ಸೃಷ್ಟಿಯಾಗಿವೆ. ಇದರಿಂದ ಪಕ್ಷ ಮತ್ತು ಸರಕಾರಕ್ಕೆ ತೊಂದರೆಯಾಗಲಿದೆ ಎಂದು ಕೆಲವು ಸಚಿವರು ವಾದಿಸಿದ್ದು, ಈ ಸಮೀಕ್ಷೆಯ ಉಸಾಬರಿಯೇ ಬೇಡ. ಮುಂದೂಡಿ ಎಂದು ಸಿಎಂಗೆ ಮನವಿ ಮಾಡಿದ್ದಾರೆ. (ಲಿಂಗಾಯತ ಧರ್ಮ ಎಂದ ಸ್ವಾಮೀಜಿ)
ಹೊಸ ಸಮೀಕ್ಷೆ ವಿಚಾರದಲ್ಲೂಇದೇ ಸ್ಥಿತಿ ಪುನರಾವರ್ತನೆ

ಕಾಂತರಾಜ್‌ ಅಧ್ಯಕ್ಷತೆಯ ಆಯೋಗದ 2015ರ ಸಮೀಕ್ಷಾ ವರದಿ ಮತ್ತು ಈ ವರದಿಯ ದತ್ತಾಂಶ ಆಧರಿಸಿದ ಜಯಪ್ರಕಾಶ್‌ ಹೆಗ್ಡೆ ವರದಿ ಅಂಗೀಕಾರ ಹಾಗೂ ಜಾರಿ ವಿಚಾರದಲ್ಲಿ ಹಿಂದಿನ ಸಚಿವ ಸಂಪುಟ ಸಭೆಗಳಲ್ಲಿ ಭಿನ್ನಾಭಿಪ್ರಾಯ ಸೃಷ್ಟಿಯಾಗಿತ್ತು. ಹೊಸ ಸಮೀಕ್ಷೆ ವಿಚಾರದಲ್ಲೂಇದೇ ಸ್ಥಿತಿ ಪುನಾವರ್ತನೆಯಾಗಿರುವುದು ಗಮನ ಸೆಳೆದಿದೆ.
ಬ್ಯಾಲೆಟ್‌ ಬಳಕೆಗೆ ಸುಗ್ರೀವಾಜ್ಞೆ ಇಲ್ಲ ಸದ್ಯದ ಕಾನೂನಿನಲ್ಲೇ ಅವಕಾಶ

ಸ್ಥಳೀಯ ಸಂಸ್ಥೆಗಳ ಚುನಾವಣೆಗೆ ಇವಿಎಂ ಬದಲಿಗೆ ಮತ ಪತ್ರ (ಬ್ಯಾಲೆಟ್‌) ಬಳಸುವ ತೀರ್ಮಾನದಂತೆ ಕಾನೂನು ತಿದ್ದುಪಡಿಗಾಗಿ ಸುಗ್ರೀವಾಜ್ಞೆ ಹೊರಡಿಸುವ ನಿರ್ಧಾರವನ್ನು ಸರಕಾರ ಬಹುತೇಕ ಕೈಬಿಟ್ಟಿದೆ. ಸ್ಥಳೀಯ ಸಂಸ್ಥೆಗಳ ಚುನಾವಣೆಗೆ ಇವಿಎಂ ಅಥವಾ ಬ್ಯಾಲೆಟ್‌ ಪೈಕಿ ಯಾವುದನ್ನು ಬೇಕಾದರೂ ಬಳಸಲು ಸದ್ಯದ ಕಾನೂನಿನಲ್ಲೇ ಅವಕಾಶವಿದ್ದು, ಹೊಸದಾಗಿ ಕಾನೂನು ತಿದ್ದುಪಡಿ ಅಗತ್ಯವಿಲ್ಲಎಂದು ರಾಜ್ಯ ಚುನಾವಣಾ ಆಯೋಗ ಅಭಿಪ್ರಾಯ ನೀಡಿದೆ. ಹಾಗಾಗಿ ಸಂಬಂಧಿತ ಕಾಯಿದೆಗಳಲ್ಲಿತಿದ್ದುಪಡಿ ಮಾಡಿ ಸುಗ್ರೀವಾಜ್ಞೆಗಳನ್ನು ಹೊರಡಿಸುವ ತೀರ್ಮಾನದಿಂದ ಸರಕಾರ ಹಿಂದೆ ಸರಿದಿದೆ.

ಸಂಪುಟ ಸಭೆ ಬಳಿಕ ಸುದ್ದಿಗಾರರೊಂದಿಗೆ ಮಾತನಾಡಿದ ಕಾನೂನು ಸಚಿವ ಎಚ್‌.ಕೆ.ಪಾಟೀಲ್‌, ”ಸುಗ್ರೀವಾಜ್ಞೆ ಅಗತ್ಯವಿಲ್ಲಎಂಬ ಅಭಿಪ್ರಾಯ ಬಂದಿದೆ. ಹಾಗಾಗಿ ರಾಜ್ಯ ಚುನಾವಣಾ ಆಯುಕ್ತರ ಜತೆ ಮತ್ತೊಮ್ಮೆ ಚರ್ಚಿಸಿ ಸೂಕ್ತ ತೀರ್ಮಾನ ಕೈಗೊಳ್ಳಲಾಗುವುದು,” ಎಂದು ತಿಳಿಸಿದರು.