ಔರಾದ್ ಪಟ್ಟಣದ ಅಮರೇಶ್ವರ ದೇವರ ವೈಭವದ ರಥೋತ್ಸವ.!

ಬೀದರ.28.ಫೆ.25:- ಔರಾದ್ ಪಟ್ಟಣದ ಉದ್ಭವಲಿಂಗ ಅಮರೇಶ್ವರ ಜಾತ್ರಾ ಉತ್ಸವದ ಅಂಗವಾಗಿ ವೈವಿಧ್ಯಮಯ ಹೂವು ಹಾಗೂ ದೀಪಗಳಿಂದ ಆಲಂಕರಿಸಲಾಗಿದ್ದ ರಥವು ಅಮರೇಶ್ವರ ದೇವಸ್ಥಾನದ ಆವರಣದಿಂದ ಹೊರಡುತ್ತಿದ್ದಂತೆ ಸೇರಿದ ಅಪಾರ ಸಂಖ್ಯೆಯ ಭಕ್ತರ ಹರ್ಷೋಲ್ಲಾಸ ಮುಗಿಲುಮುಟ್ಟಿತು.

ಶಂಕರನ ಜಯಘೋಷ ಎಲ್ಲೆಡೆ ಮೊಳಗಿತು.ಭಕ್ತರು, ಹರಕೆ ತೀರಿಸುವ ಮೂಲಕ ಭಕ್ತಿಭಾವ ಮೆರೆದರು.

ಮಹಿಳೆಯರು, ಮಕ್ಕಳಾದಿಯಾಗಿ ರಸ್ತೆಯ ಎರಡೂ ಬದಿಯಲ್ಲಿ ನಿಂತ ಭಕ್ತರು ರಥೋತ್ಸವವನ್ನು ಸ್ವಾಗತಿಸಿದರು. ಕೆಲವರು ಕಟ್ಟಡಗಳ ಮೇಲೆ ನಿಂತು ಅಮರೇಶ್ವರ ದೇವರಿಗೆ ನಮಿಸಿದರು.

ರಥಕ್ಕೆ ಪೂಜೆ ಸಲ್ಲಿಸಿ ಕಾಯಿ ಒಡೆದು ತಮ್ಮ ಇಷ್ಟಾರ್ಥ ಪೂರೈಸಿದರು. ರಥದ ದಾರಿಯೂದ್ದಕ್ಕೂ ಬಣ್ಣ ಬಣ್ಣದ ರಂಗೋಲಿ ಕಣ್ಮನ ಸೆಳೆಯುವಂತಿತ್ತು. ರಥದ ಮೇಲೆ ಹೂ ಮಳೆ ಸುರಿಯುವ ದೃಶ್ಯ ಭಕ್ತರನ್ನು ಮತ್ತಷ್ಟು ಗಮನ ಸೆಳೆಯಿತು.

ವೀರಗಾಸೆ ಕುಣಿತ, ಮಕ್ಕಳ ಕೋಲಾಟ, ಡೊಳ್ಳು ಕುಣಿತ, ಡಿಜೆ ಮೇಲಿನ ಯುವಕರ ನೃತ್ಯ ಮೆರವಣಿಗೆಯ ಸಂಭ್ರಮವನ್ನು ಹೆಚ್ಚಿಸಿತು.