ಸಿಎಂ, ಸಚಿವರ ಹೆಸರು ಬರೆದಿಟ್ಟು ಅತಿಥಿ ಉಪನ್ಯಾಸಕ ಆತ್ಮಹತ್ಯೆ ಬೆದರಿಕೆ!

ಬೆಳಗಾವಿ.29.ಸೆಪ್ಟೆಂಬರ್.25:- ಚಿಕ್ಕೋಡಿಯ ಡಾ. ನೇಮಿನಾಥ ತಪಕೀರೆ ಎಂಬ ಅತಿಥಿ ಉಪನ್ಯಾಸಕ ಸರ್ಕಾರದ ವಿರುದ್ಧ ಆರೋಪ ಮಾಡಿ ಸುದೀರ್ಘ ಪತ್ರ ಬರೆದು ಮೊಬೈಲ್ ಸ್ವಿಚ್ ಆಫ್‌ ಮಾಡಿದ್ದಾರೆ. ಅತಿಥಿ ಉಪನ್ಯಾಸಕನ ನಡೆ ಆತಂಕಕ್ಕೆ ಕಾರಣವಾಗಿದೆ.

ಅತಿಥಿ ಉಪನ್ಯಾಸಕ ಹುದ್ದೆಯಲ್ಲಿ ಅಭದ್ರತೆ ಕಾಡುತ್ತಿರುವುದರಿಂದ ಅತಿಥಿ ಉಪನ್ಯಾಸಕನೋರ್ವ ರಾಜ್ಯ ಸರ್ಕಾರ, ಮುಖ್ಯಮಂತ್ರಿ ಹಾಗೂ ಉನ್ನತ ಶಿಕ್ಷಣ ಸಚಿವರ ಹೆಸರು ಬರೆದು ಆತ್ಮಹತ್ಯೆಗೆ ನಿರ್ಧರಿಸಿದ್ದು, ಡೆತ್ ನೋಟ್ ಬರೆದು ಸಾಮಾಜಿಕ ಜಾಲತಾಣದಲ್ಲಿ ಹರಿಬಿಟ್ಟು ಮೊಬೈಲ್ ಸ್ವಿಚ್ ಆಫ್ ಮಾಡಿರುವುದು ಆತಂಕಕ್ಕೆ ಕಾರಣವಾಗಿದೆ.

ಕಳೆದ ಎಂಟು ವರ್ಷಗಳಿಂದ ಅತಿಥಿ ಉಪನ್ಯಾಸಕನಾಗಿ ಸೇವೆ ಸಲ್ಲಿಸಿದ್ದೇನೆ. ಅತಿಥಿ ಉಪನ್ಯಾಸಕರ ಕುರಿತಾಗಿ ಸರ್ಕಾರ ತಳೆಯುತ್ತಿರುವ ಧೋರಣೆ ಎಲ್ಲರಲ್ಲಿ ಅಭದ್ರತೆ ಹುಟ್ಟು ಹಾಕುತ್ತಿದೆ. ಸುಂದರವಾದ ಬದುಕನ್ನು ಕಟ್ಟಿಕೊಂಡು ಬಾಳಬೇಕಾದ ಅತಿಥಿ ಉಪನ್ಯಾಸಕರೆಲ್ಲ ಅತಂತ್ರರಾಗಿ ಒದ್ದಾಡುವಂತಹ ಪರಿಸ್ಥಿತಿ ಎದುರಾಗಿದೆ.

ಇದು ಇಂದು ನಿನ್ನೆಯದ್ದಲ್ಲ. ಪ್ರತೀ ವರ್ಷ ಮತ್ತೆ ಮತ್ತೆ ಆತಂಕವನ್ನು ಎದುರಿಸುತ್ತ ಹೇಗೋ? ಏನೋ? ಕೌನ್ಸೆಲಿಂಗ್ ನಲ್ಲಿ ಕೆಲಸ ಸಿಗುತ್ತೋ ಇಲ್ಲವೋ? ಸಿಕ್ಕರೆ ಎಲ್ಲಿ ಸಿಗುತ್ತೆ? ಹೀಗೆ ಹಲವಾರು ಪ್ರಶ್ನೆಗಳೊಂದಿಗೆ ಅಸಹಾಯಕರಾಗಿ ಕಾಯುವಂತಹ ಪರಿಸ್ಥಿತಿ‌ ಇದೆ.

ಕೆಸೆಟ್, ನೆಟ್, ಪಿಎಚ್ ಡಿ ಅರ್ಹತೆ ಪಡೆದಿದ್ದೂ ಸರ್ಕಾರ ಕಾಲ ಕಾಲಕ್ಕೆ ಸರಿಯಾಗಿ ನೇಮಕಾತಿ ಮಾಡದೇ ಇರುವುದರಿಂದ ಅತಿಥಿ ಉಪನ್ಯಾಸಕರಾಗಿ ಕಾರ್ಯನಿರ್ವಹಿಸುವ ಅನಿವಾರ್ಯತೆ.

ಇನ್ನೂ ಅರ್ಹತೆ ಇಲ್ಲದಿರುವವರ ಪಾಡಂತೂ ಅಧೋಗತಿ. ಸಾಕಷ್ಟು ಅರ್ಹತೆ ಹೊಂದಿದ್ದು, ಹಲವಾರು ಪುಸ್ತಕಗಳನ್ನು ಪ್ರಕಟಿಸಿ, ಹತ್ತಾರು ಸಂಶೋಧನ ಲೇಖನಗಳನ್ನು ಪ್ರಕಟಿಸಿ ಖಾಯಂ ಉಪನ್ಯಾಸಕರಿಗಿಂತಲೂ ಉತ್ತಮ ಬೋಧನೆ ಮಾಡುತ್ತ ವಿದ್ಯಾರ್ಥಿಗಳಿಂದ ಮೆಚ್ಚುಗೆ ಪಡೆದುಕೊಂಡು, ತಮ್ಮ ಬದುಕನ್ನು ತೇಯುತ್ತಿರುವ ಅತಿಥಿ ಉಪನ್ಯಾಸಕರು ಅಭದ್ರತೆಯನ್ನು ಅನುಭವಿಸಬೇಕಾಗಿದೆ.

ಒಂದು ದೇಶವನ್ನು ಹಾಳು ಮಾಡಬೇಕಾದರೆ ಆ ದೇಶದ ಶಿಕ್ಷಣ ವ್ಯವಸ್ಥೆಯನ್ನು ಹಾಳು ಮಾಡಿದರೆ ಸಾಕು ಎಂಬಂತೆ, ಇಂದು ಬಡ ಮಕ್ಕಳು ಓದುತ್ತಿರುವ ಸರ್ಕಾರಿ ಪ್ರಥಮ ದರ್ಜೆ ಕಾಲೇಜುಗಳ ಶೈಕ್ಷಣಿಕ ಮಟ್ಟ ಕುಸಿಯುವುದಕ್ಕೆ ಸರ್ಕಾರವೇ ಹೊಣೆಯಾಗಿದೆ. ಇತ್ತ ಅತಿಥಿ ಉಪನ್ಯಾಸಕರ ಬದುಕು ಹಾಳಾದರೆ, ಅತ್ತ ವಿದ್ಯಾರ್ಥಿಗಳ ಭವಿಷ್ಯ ಹಾಳಾಗುತ್ತಿದೆ.

ಸಾಕಷ್ಟು ಅರ್ಹತೆಗಳನ್ನು ಹೊಂದಿದಾಗಿಯೂ ನಮ್ಮ ಅತಿಥಿ ಉಪನ್ಯಾಸಕರ ಸೇವೆಯನ್ನು ಪರಿಗಣಿಸಿ ಒಂದು ಭದ್ರತೆಯನ್ನು ನೀಡುವಲ್ಲಿ ಸರ್ಕಾರ ಪದೇ ಪದೇ ಹಿಂದೇಟು ಹಾಕುತ್ತಲೇ ಇದೆ. ಸರ್ಕಾರ ಯಾವ ಯಾವುದೋ ಯೋಜನೆಗಳನ್ನು ಜಾರಿಗೆ ತರುವಾಗ ಇಲ್ಲದೇ ಇರುವ ಕಾನೂನು ತೊಡಕುಗಳು ಅತಿಥಿ ಉಪನ್ಯಾಸಕರ ಸೇವಾ ಸಕ್ರಮ ಮಾಡಬೇಕಾದಾಗ ಹೇಗೆ ಬರುತ್ತವೆ ಸ್ವಾಮಿ?

ಇದು ಇಲ್ಲಿಗೇ ನಿಲ್ಲಬೇಕು. ಅತಿಥಿ ಉಪನ್ಯಾಸಕರೂ ನೆಮ್ಮದಿಯ ಬದುಕು ಸಾಗಿಸಬೇಕು. ಹಾಗೆ ಆಗಬೇಕಾದರೆ ನಾವು ಹೋರಾಟ ಮಾಡಬೇಕು. ಈಗಾಗಲೇ ಸಾಕಷ್ಟು ವರ್ಷಗಳಿಂದ ಹೋರಾಟಗಳು ನಡೆದಿವೆ.

  ಸರ್ಕಾರ ಮೂಗಿಗೆ ತುಪ್ಪ ಒರೆಸುವ ಕೆಲಸ ಮಾಡಿದೆ. ಆದರೆ ಇದಕ್ಕೆ ಒಂದು ಶಾಶ್ವತ ಪರಿಹಾರ ಬೇಕು. ಆದ್ದರಿಂದ ಆ ಹೋರಾಟಕ್ಕೆ ನಾನು ನನ್ನ ಪ್ರಾಣ ಕೊಡಲು ಸಿದ್ಧನಾಗಿದ್ದೇನೆ. ಇದರಿಂದಲಾಗಿಯಾದರೂ ಸರ್ಕಾರ ಎಚ್ಚೆತ್ತುಕೊಳ್ಳಲಿ. ನನ್ನಂತೆ ಸಂಕಷ್ಟ ಎದುರಿಸುತ್ತಿರುವ ಎಷ್ಟೋ ಜನ ಅತಿಥಿ ಉಪನ್ಯಾಸಕರ ಬದುಕು ಬೆಳಕು ಕಾಣುತ್ತದೆ ಅನ್ನುವುದಾದರೆ ನಾನು ನನ್ನ ಜೀವವನ್ನು ಬಲಿದಾನ ಮಾಡಲು ಸಿದ್ಧನಾಗಿದ್ದೇನೆ.

ಎಲ್ಲಾ ನನ್ನ ಅತಿಥಿ ಉಪನ್ಯಾಸಕ ಮಿತ್ತರೇ, ಈ ನನ್ನ ಸಾವಿನೊಂದಿಗೆ ನಿಮ್ಮ ಹೋರಾಟ ತೀವ್ರವಾಗಲಿ… ನಿಮ್ಮ ಹೋರಾಟಕ್ಕೆ ನನ್ನ ಜಯ ಸಿಗಲಿ. ಸರ್ಕಾರ ಇದರ ಮೂಲಕವಾದರೂ ಎಚ್ಚೆತ್ತು ಅತಿಥಿ ಉಪನ್ಯಾಸಕರ ಬದುಕಿಗೆ ಬೆಳಕು ತೋರುವ ಕೆಲಸ ಮಾಡಲಿ. ಇಲ್ಲಿ ಅರ್ಹ, ಅನರ್ಹ ಅನ್ನೋ ಪ್ರಶ್ನೆ ಬೇಡ. ಆ ರೀತಿಯ ತಾರತಮ್ಯ ಬೇಡ. ಹೀಗಾಗಿಯೇ ಹೋರಾಟ ಗಟ್ಟಿಯಾಗಿ ನಿಲ್ಲುತ್ತಿಲ್ಲ.

ಅತಿಥಿ ಉಪನ್ಯಾಸಕರಾಗಿ ಸೇವೆ ಸಲ್ಲಿಸಿದ ಪ್ರತಿಯೊಬ್ಬರಿಗೂ ನ್ಯಾಯ ಸಿಗಬೇಕು. ನಿಮ್ಮ ಹೋರಾಟ ಗಟ್ಟಿಯಾಗಲಿ.ನಾನು ಆತ್ಮಬಲಿದಾನಕ್ಕೆ ಸಿದ್ಧನಾಗಿದ್ದೇನೆ. ನನ್ನ ಸಾವಿಗೆ ಕರ್ನಾಟಕ ಸರ್ಕಾರ, ಮುಖ್ಯ ಮಂತ್ರಿ ಹಾಗೂ ಉನ್ನತ ಶಿಕ್ಷಣ ಸಚಿವರೇ ನೇರ ಹೊಣೆಗಾರರು. ನನ್ನೆಲ್ಲ ಬಂಧು ಮಿತ್ರರಿಗೆ ಜಯವಾಗಲಿ.ಕ್ಷಮೆ ಇರಲಿ ಮುದ್ದು ಮಗಳೇ, ಅಮ್ಮನ ಜೊತೆಗೆ ಖುಷಿಯಾಗಿರು, ನಿಮ್ಮಪ್ಪ ಮತ್ತೆ ಹುಟ್ಟಿ ಬರ್ತಾನೆ…. ಎಂದು ಬರೆಯಲಾಗಿದೆ.