ಸಿಎಂ, ಡಿಸಿಎಂ ಬಣ ತಿಕ್ಕಾಟ: ಈಗ ತಟಸ್ಥ ಶಾಸಕರ ಸಂಖ್ಯೆಯೇ ಅಧಿಕ!

ಬೆಂಗಳೂರು.23.ನವೆಂಬರ್.25: ರಾಜ್ಯದಲ್ಲಿ ಎರಡೂ ಶಕ್ತಿ ಕೇಂದ್ರಗಳಿಂದ ಸಿಎಂ ಸಿದ್ದರಾಮಯ್ಯ  ಡಿಸಿಎಂ ಡಿ.ಕೆ.ಶಿವಕುಮಾರ್‌ ಅಂತರ ಕಾಯ್ದುಕೊಳ್ಳುವ ಮೂಲಕ ಜಾಣ್ಮೆಯ ನಡೆ ಅನುಸರಿಸುತ್ತಿದ್ದಾರೆ.

ಮುಖ್ಯಮಂತ್ರಿ ಪಟ್ಟ ಉಳಿಸಿಕೊಳ್ಳಲು ಹಾಗೂ ಮುಖ್ಯಮಂತ್ರಿ ಪಟ್ಟ ದಕ್ಕಿಸಿಕೊಳ್ಳಲು ಸಿದ್ದರಾಮಯ್ಯ ಹಾಗೂ ಶಿವಕುಮಾರ್‌ ಮಧ್ಯೆ ಹಗ್ಗಜಗ್ಗಾಟ, ತಂತ್ರ  ಪ್ರತಿತಂತ್ರದ ರಾಜಕೀಯ ಆಟಗಳು ಶುರುವಾಗಿದ್ದು, ಯಾವ ಕಡೆ ವಾಲಿದರೂ ಕಷ್ಟ ಎಂಬ ಸ್ಥಿತಿಯಲ್ಲಿರುವ ಕಾಂಗ್ರೆಸ್‌ನ ಬಹುತೇಕ ಶಾಸಕರು ‘ತಟಸ್ಥ’ ನಿಲುವು ತೆಗೆದುಕೊಂಡಿದ್ದಾರೆ. ಈ ಮೂಲಕ ಮುಂದಿನ ಬೆಳವಣಿಗೆಗಳ ಮೇಲೆ ಕಣ್ಣಿಟ್ಟಿದ್ದಾರೆ.

ಸಿದ್ದರಾಮಯ್ಯ ಸುತ್ತ ತಮ್ಮ ಆಪ್ತ ಬಳಗ (ಡಾ.ಎಚ್‌.ಸಿ.ಮಹದೇವಪ್ಪ, ಸತೀಶ್‌ ಜಾರಕಿಹೊಳಿ, ಡಾ.ಜಿ.ಪರಮೇಶ್ವರ್, ಎಂ.ಬಿ.ಪಾಟೀಲ್‌, ಕೆ.ಜೆ.ಜಾರ್ಜ್‌, ಕೆ.ಎಚ್‌.ಮುನಿಯಪ್ಪ, ಬೈರತಿ ಸುರೇಶ್‌, ದಿನೇಶ್‌ ಗುಂಡೂರಾವ್‌, ಜಮೀರ್‌ ಅಹ್ಮದ್‌, ಬಸವರಾಜ ರಾಯರೆಡ್ಡಿ ಮತ್ತಿತರರು) ಸದಾ ಗಿರಕಿ ಹಾಕುತ್ತಿದ್ದರೆ, ಡಿ.ಕೆ.ಶಿವಕುಮಾರ್‌ ಸುತ್ತ ಸದ್ಯಕ್ಕೆ ಬಹುತೇಕ ಒಕ್ಕಲಿಗ ಶಾಸಕರ ಜತೆಗೆ ದಲಿತ ಸಮುದಾಯಕ್ಕೆ ಸೇರಿದ ಕೆಲವು ಶಾಸಕರು ಗುರುತಿಸಿಕೊಂಡಿದ್ದಾರೆ. ಆದರೆ, ಈ ಎರಡೂ ಬಣಗಳಿಂದ ಸಚಿವ ಸಂಪುಟದ ಬಹುತೇಕ ಸದಸ್ಯರು ಹಾಗೂ ಆಡಳಿತ ಪಕ್ಷದ ಶಾಸಕರು ಅಂತರ ಕಾಯ್ದುಕೊಂಡಿದ್ದಾರೆ. ಹೀಗಾಗಿ ‘ತಟಸ್ಥ’ರೇ ಬಹುಮತವುಳ್ಳವರಾಗಿದ್ದಾರೆ ಎಂಬ ಮಾತುಗಳು ಪಕ್ಷದ ವಲಯದಲ್ಲಿ ಕೇಳಿ ಬರುತ್ತಿವೆ.

ಮಂತ್ರಿಗಿರಿ ಆಸೆ:

ಕೆಲವರು ಸಚಿವ ಸ್ಥಾನ ಉಳಿಸಿಕೊಳ್ಳಲು ಹಾಗೂ ಸಚಿವರಾಗಲು ನಿತ್ಯ ಸಿಎಂ ಸಿದ್ದರಾಮಯ್ಯಗೆ ಮುಖ ತೋರಿಸುತ್ತಿದ್ದಾರೆ, ಇನ್ನು ಕೆಲವರಿಗೆ ಸ್ವತಃ ಸಿಎಂ ಅವರೇ ನಿಮ್ಮನ್ನು ಮಂತ್ರಿ ಮಾಡುವೆ ಎಂದು ಹೇಳುತ್ತಿದ್ದಾರೆ ಎನ್ನಲಾಗುತ್ತಿದೆ. ಅದೇ ರೀತಿ ಡಿಸಿಎಂ ಡಿ.ಕೆ.ಶಿವಕುಮಾರ್‌ ಸಹ ಹಲವರ ಮೂಗಿಗೆ ಸಚಿವ ಸ್ಥಾನದ ತುಪ್ಪ ಸವರಿದ್ದಾರೆನ್ನಲಾಗಿದೆ. ಹೀಗಾಗಿ ಅಧಿಕಾರದ ಮೇಲೆ ಕಣ್ಣಿಟ್ಟಿರುವ ಹಲವರು ಎರಡೂ ಶಕ್ತಿ ಕೇಂದ್ರಗಳಲ್ಲಿ ನೇರವಾಗಿ ಗುರುತಿಸಿಕೊಳ್ಳುತ್ತಿದ್ದಾರೆ. ಆದರೆ, ಅಧಿಕಾರದಾಸೆ ಇದ್ದರೂ ಯಾವ ಕಡೆಯೂ ವಾಲದೆ ಹೈಕಮಾಂಡ್‌ ಕಡೆ ನೋಡುವವರೇ ಹೆಚ್ಚಿದ್ದಾರೆ.

ರಾಜಕೀಯ ಬದಲಾವಣೆ ಸಮಯದಲ್ಲಿ ಯಾವ ಕಡೆ ಗುರುತಿಸಿಕೊಂಡರೂ ಭವಿಷ್ಯದಲ್ಲಿ ಸಮಸ್ಯೆಗಳನ್ನು ಎದುರಿಸಬೇಕಾಗುತ್ತದೆ ಎಂಬುದನ್ನು ಅರಿತಿರುವ ಶಾಸಕರು ಈಗ ಕಾಂಗ್ರೆಸ್‌ ಹೈಕಮಾಂಡ್ ತೀರ್ಮಾನ ಏನು ಎಂಬುದನ್ನು ಕಾಯುತ್ತಿದ್ದಾರೆ.

ನಿಲ್ಲದ ಯಾತ್ರೆ: ನಾಳೆ ಮತ್ತೊಂದು ತಂಡ ದಿಲ್ಲಿಗೆ?:

ಬೆಂಗಳೂರು: ಎರಡು ದಿನಗಳಿಂದ ನವದೆಹಲಿಯಲ್ಲಿ ಬೀಡು ಬಿಟ್ಟಿದ್ದ ಕಾಂಗ್ರೆಸ್‌ ಶಾಸಕರ ಒಂದು ತಂಡ ಶನಿವಾರ ಬೆಂಗಳೂರಿಗೆ ಮರಳಿದ್ದು, ಸೋಮವಾರ ಮತ್ತೊಂದು ತಂಡ ದಿಲ್ಲಿಗೆ ಹಾರಲು ಸಿದ್ಧವಾಗುತ್ತಿದೆ.

ದೆಹಲಿಯಿಂದ ಬಂದಿಳಿದ ಅನೇಕರು ಡಿ.ಕೆ.ಶಿವಕುಮಾರ್ ಮುಖ್ಯಮಂತ್ರಿ ಆಗಲೇಬೇಕು ಎಂದು ಪ್ರತಿಪಾದಿಸಿದ್ದರೆ, ಇನ್ನು ಕೆಲವರು ತಮಗೆ ಮಂತ್ರಿ ಸ್ಥಾನ ಸಿಗಬೇಕು ಎಂಬ ದಾಳವನ್ನೂ ಉರುಳಿಸಿದ್ದಾರೆ.

ಶನಿವಾರ ಎರಡು ಪ್ರತ್ಯೇಕ ತಂಡದಲ್ಲಿ ಶಾಸಕರು ಬಂದಿಳಿದಿದ್ದು, ಮೊದಲ ತಂಡದಲ್ಲಿ ಆನೇಕಲ್ ಶಿವಣ್ಣ, ಎಂಎಲ್‌ಸಿ ರವಿ, ಕಿಯೋನಿಕ್ಸ್ ಅಧ್ಯಕ್ಷ ಶರತ್ ಬಚ್ಚೇಗೌಡ ಬಂದಿಳಿದರೆ, 2ನೇ ತಂಡದಲ್ಲಿ ಗುಬ್ಬಿ ಶ್ರೀನಿವಾಸ್, ಕುಣಿಗಲ್ ರಂಗನಾಥ್ ಆಗಮಿಸಿದರು.

ಕಮರುತ್ತಿರುವ 2.5 ವರ್ಷದ ಸಂಭ್ರಮ:

ರಾಜ್ಯ ಸರ್ಕಾರಕ್ಕೆ ಎರಡೂವರೆ ವರ್ಷ ಪೂರ್ಣಗೊಂಡ ಸಂಭ್ರಮವೆಲ್ಲ ಶಾಸಕರ ಬಣ ರಾಜಕಾರಣದಿಂದ ಕಮರಿ ಹೋಗಿದ್ದು, ನಾಯಕತ್ವ ಬದಲಾವಣೆ ಮೇಲೆ ಒಂದಿಷ್ಟು ಮಂದಿ ನೇರ ದೃಷ್ಟಿ ಇಟ್ಟಿದ್ದರೆ, ಸಂಪುಟ ಸೇರಲು ಇನ್ನೊಂದಷ್ಟು ಜನರು ತವಕಿಸುತ್ತಿದ್ದಾರೆ. ಮತ್ತೊಂದಿಷ್ಟು ಮಂದಿ ಇರುವ ಸ್ಥಾನವನ್ನು ಉಳಿಸಿಕೊಳ್ಳಲು ಕಸರತ್ತು ನಡೆಸುವಂತಾಗಿದ್ದು, ಯಾವುದರ ಗೊಡವೆಯೂ ಬೇಡ ಎನ್ನುವಂತೆ ಬಣ ರಾಜಕಾರಣದಿಂದ ದೂರು ಉಳಿದು ತಟಸ್ಥ ನೀತಿ ಅನುಸರಿಸುತ್ತಿರುವ ಗುಂಪೂ ಕಾಂಗ್ರೆಸ್‌ನಲ್ಲಿ ಕಾಣಿಸಿಕೊಂಡಿದೆ.

ನಾಳೆ ದಿಲ್ಲಿಗೆ ಖರ್ಗೆ, ಮತ್ತೆರಡು ಗುಂಪು ದಿಲ್ಲಿಯತ್ತ?:

ಇದೆಲ್ಲದರ ನಡುವೆ ಎಐಸಿಸಿ ಅಧ್ಯಕ್ಷ ಮಲ್ಲಿಕಾರ್ಜುನ ಖರ್ಗೆ ಸೋಮವಾರ ದೆಹಲಿಗೆ ಪ್ರಯಾಣ ಬೆಳೆಸಲಿದ್ದಾರೆ. ಇದೇ ವೇಳೆ, ಗುಂಪಿನಲ್ಲಿ ಯಾರೂ ದಿಲ್ಲಿಗೆ ಬರಬೇಡಿ ಎಂಬುದಾಗಿ ಖರ್ಗೆ ಹೇಳಿ ಹೊರಟ ಕೂಡಲೇ ದಿಲ್ಲಿಗೆ ಹಾರಲು ಶಾಸಕರು ಗುಂಪು ತುದಿಗಾಲ ಮೇಲೆ ನಿಂತಿದೆ. ಮಾಗಡಿ ಬಾಲಕೃಷ್ಣ ಸೇರಿದಂತೆ ಹಲವು ಶಾಸಕರೂ ಸೋಮವಾರ ದೆಹಲಿಗೆ ಹಾರಲಿದ್ದಾರೆ. ಡಿ.ಕೆ.ಶಿವಕುಮಾರ್ ಪರವಾದ ಒಂದು ಗುಂಪು 2 ದಿನ ದಿಲ್ಲಿಯಲ್ಲಿ ಒತ್ತಡ ಹಾಕಿದರೆ, ಸೋಮವಾರ ತೆರಳಲಿರುವ ಮತ್ತೊಂದು ಗುಂಪೂ ಹೈಕಮಾಂಡ್‌ ಅನ್ನು ತುದಿಗಾಲ ಮೇಲೆ ನಿಲ್ಲಿಸುವ ಸಂಭವ ಇದೆ. ಜತೆಗೆ ಬುಧವಾರ ಮತ್ತೆ ಹತ್ತಾರು ಶಾಸಕರು ದಿಲ್ಲಿ ವಿಮಾನ ಹತ್ತಲು ಸಜ್ಜಾಗಿದ್ದು, ಪಕ್ಷದಲ್ಲಿನ ಗೊಂದಲಗಳಿಗೆ ತೆರೆ ಬೀಳಬೇಕಿದ್ದರೆ ಡಿಸಿಎಂ ಶಿವಕುಮಾರ್‌ ಅವರನ್ನು ಸಿಎಂ ಮಾಡಲೇಬೇಕು ಎನ್ನುವ ಒತ್ತಡವನ್ನು ವರಿಷ್ಠರ ಮೇಲೆ ಹೇರುವ ಸಾಧ್ಯತೆಗಳಿವೆ.

ಕೈ ಶಾಸಕರೊಂದಿಗೆ ಕಾಣಿಸಿಕೊಂಡ ಎಸ್‌ಟಿಎಸ್: ‌

ಕೆಂಪೇಗೌಡರ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ದಿಲ್ಲಿಯಿಂದ ಬಂದಿಳಿದ ಕಾಂಗ್ರೆಸ್‌ ಶಾಸಕ ಶ್ರೀನಿವಾಸ್ ಜತೆ ಬಿಜೆಪಿ ಉಚ್ಚಾಟಿತ ಶಾಸಕ ಎಸ್.ಟಿ. ಸೋಮಶೇಖರ್ ಕಾಣಿಸಿಕೊಂಡಿರುವುದು ಕುತೂಹಲ ಕೆರಳಿಸಿದೆ. ವಿಮಾನ ನಿಲ್ದಾಣದಲ್ಲಿ ಸುದ್ದಿಗಾರರೊಂದಿಗೆ ಮಾತನಾಡಿದ ಸೋಮಶೇಖರ್, ಅರ್ಜಿಗಳ ಸಮಿತಿ ಸಭೆ ಇತ್ತು. ಚಿಕ್ಕಮಗಳೂರಿಗೆ ಹೋಗಿ, ಅಲ್ಲಿಂದ ಮಂಗಳೂರಿಗೆ ಹೋಗಿದ್ದೆ. ಇವತ್ತು ವಾಪಸ್ ಬಂದಿದ್ದೇನೆ. ಕಾಂಗ್ರೆಸ್‌ನಲ್ಲಿ ಏನು ನಡೆಯುತ್ತಿದೆಯೋ ಗೊತ್ತಿಲ್ಲ. ಬಿಜೆಪಿಯಿಂದ ನನ್ನನ್ನು ಉಚ್ಚಾಟಿಸಿದ್ದಾರೆ ಎನ್ನುವ ಮೂಲಕ ವದಂತಿಗಳಿಗೆ ತೆರೆ ಎಳೆಯುವ ಪ್ರಯತ್ನ ಮಾಡಿದರು.

ಸಚಿವ ಸಂಪುಟ ಪುನಾಚರನೆ, ವಿಸ್ತರಣೆ ಎಲ್ಲವನ್ನೂ ಹೈಕಮಾಂಡ್ ಹೇಳಬೇಕು. ನಮ್ಮದೇನೂ ಇಲ್ಲ. ನಾನು ಬರೀ ಎಂಎಲ್‌ಸಿ ಅಷ್ಟೇ. ನಮ್ಮ ಪಕ್ಷದಲ್ಲಿ ಬಣ ಇಲ್ಲ. ನಾವೆಲ್ಲರೂ ಕಾಂಗ್ರೆಸ್‌ ಬಣದವರು. ಬೇರೆ ರೀತಿ ವ್ಯಾಖ್ಯಾನಿಸಿದರೆ ಏನೂ ಮಾಡಲಾಗಲ್ಲ. ಎಲ್ಲರೂ ಮಂತ್ರಿ ಪದವಿ ಕೇಳಲು ಹೋಗಿದ್ದೆವು. ಡಿ.ಕೆ.ಶಿವಕುಮಾರ್ ಸಿಎಂ ಆಗಬಾರದು ಎಂದು ಯಾರು ಹೇಳುತ್ತಾರೆ. ಅವರು ಪಕ್ಷಕ್ಕೆ ನಿಷ್ಠಾವಂತರಾಗಿ ದುಡಿದಿದ್ದಾರೆ. ಸಂದರ್ಭ ಬಂದಾಗ ಆಗುತ್ತಾರೆ. ಅದನ್ನು ಹೈಕಮಾಂಡ್ ತೀರ್ಮಾನಿಸಬೇಕು.- ರವಿ, ವಿಧಾನಪರಿಷತ್ ಕಾಂಗ್ರೆಸ್ ಸದಸ್ಯ

ಹೈಕಮಾಂಡ್ ಆಶೀರ್ವಾದ ಪಡೆಯಲು ಹೋಗಿದ್ದೆವು. ಕ್ಷೇತ್ರ ಹಾಗೂ ಕಿಯೋನಿಕ್ಸ್ ಸಾಧನೆಗಳನ್ನು ಖರ್ಗೆ ಗಮನಕ್ಕೆ ತಂದಿದ್ದೇನೆ. ಅವರ ಆಶೀರ್ವಾದ, ಬೆಂಬಲ, ಸಹಕಾರ, ಸಹಯೋಗ ಕೇಳಿದ್ದೇವೆ. ಹೈಕಮಾಂಡ್ ತೀರ್ಮಾನಕ್ಕೆ ನಾವೆಲ್ಲರೂ ಬದ್ಧರಾಗಿದ್ದೇವೆ.- ಶರತ್ ಬಚ್ಚೇಗೌಡ, ಕಿಯೋನಿಕ್ಸ್ ಅಧ್ಯಕ್ಷ

ಎನ್‌ಎಸ್‌ಯುಐ, ಯುವ ಕಾಂಗ್ರೆಸ್‌, ಜಿಲ್ಲಾ ಪರಿಷತ್ ಅಧ್ಯಕ್ಷನಾಗಿ ಬಂದವನು ನಾನು. ನಿಷ್ಠಾವಂತನಾಗಿ ಕೆಲಸ ಮಾಡಿದ್ದೇನೆ. 5 ಬಾರಿ ಟಿಕೆಟ್ ಪಡೆದು 3 ಬಾರಿ ಗೆದ್ದಿದ್ದೇನೆ. ಏನೋ ಸಂಪುಟ ಪುನಾರಚನೆ ಎನ್ನುತ್ತಿದ್ದರಲ್ಲ, ಹೀಗಾಗಿ ಮಂತ್ರಿಯಾಗಲು ಅವಕಾಶ ಕೊಡಿ ಎಂದು ಕೇಳಲು ಹೋಗಿದ್ದೆ.- ಶಿವಣ್ಣ, ಆನೇಕಲ್ ಕಾಂಗ್ರೆಸ್ ಶಾಸಕ

ನಾನು ಡಿ.ಕೆ. ಶಿವಕುಮಾರ್ ಬಣ ಎಂದೂ ಹೇಳಿಲ್ಲ. ಅವರ ಬಣ, ಇವರ ಬಣ ಎಂದೆಲ್ಲ ಏನೂ ಇಲ್ಲ. ಇಬ್ಬರ ಬಣವೂ ಹೌದು. ವೈಯಕ್ತಿಕ ಕೆಲಸದ ಮೇಲೆ ದಿಲ್ಲಿಗೆ ಹೋಗಿದ್ದೇ ಹೊರತು, ರಾಜಕಾರಣ ಏನೂ ಇಲ್ಲ. - ಎಸ್.ಆರ್. ಶ್ರೀನಿವಾಸ್, ಗುಬ್ಬಿ ಶಾಸಕ

ದೆಹಲಿಯಲ್ಲಿ ನಮ್ಮ ಪಕ್ಷದ ರಾಷ್ಟ್ರೀಯ ಅಧ್ಯಕ್ಷರಾದ ಮಲ್ಲಿಕಾರ್ಜುನ ಖರ್ಗೆ ಅವರನ್ನು ಭೇಟಿ ಮಾಡಿದ್ದೇವೆ. ಹಿರಿಯರಾದ ಎಸ್.ಆರ್. ಶ್ರೀನಿವಾಸ್ ಅವರಿಗೆ ಸಚಿವ ಸ್ಥಾನ ಕೊಡಬೇಕೆಂದು ಮನವಿ ಮಾಡಿದ್ದೇವೆ. ನಾನು ನಾಯಕತ್ವದ ಬಗ್ಗೆ ಮಾತನಾಡುವಷ್ಟು ದೊಡ್ಡವನಲ್ಲ. - ರಂಗನಾಥ, ಕುಣಿಗಲ್ ಶಾಸಕ

ಸಹಕಾರ ವಲಯದ ಚುನಾವಣೆಗೆ ಸಂಬಂಧಿಸಿದಂತೆ ಕ್ರಿಪ್ಕೋ ಅಧ್ಯಕ್ಷರ ಭೇಟಿಗಾಗಿ ದಿಲ್ಲಿಗೆ ಬಂದಿದ್ದೇನೆ. ಇದರಲ್ಲಿ ರಾಜಕೀಯ ಏನೂ ಇಲ್ಲ. ಸಿಎಂ ಬದಲಾವಣೆ ಹೈಕಮಾಂಡ್‌ಗೆ ಬಿಟ್ಟದ್ದು. ಐದು ವರ್ಷ ನಾನೇ ಸಿಎಂ, ನಾನೇ ಬಜೆಟ್‌ ಮಂಡಿಸುವುದಾಗಿ ಹೇಳಿರುವ ಮುಖ್ಯಮಂತ್ರಿ ಸಿದ್ದರಾಮಯ್ಯ ಕೂಡ ಹೈಕಮಾಂಡ್ ನಿರ್ಧಾರಕ್ಕೆ ಬದ್ಧ ಎಂದಿದ್ದಾರೆ. 5 ವರ್ಷ ಸಿದ್ದರಾಮಯ್ಯ ಅವರೇ ಸಿಎಂ ಆಗಿರಬೇಕು ಎಂಬುದು ನನ್ನ ವೈಯಕ್ತಿಕ ಅಭಿಪ್ರಾಯ. – ರಾಜೇಂದ್ರ, ವಿಧಾನಪರಿಷತ್ ಸದಸ್ಯ