ಶಿಕ್ಷಕರ, ಬಿಇಒ ವಿರುದ್ಧ ಶಿಸ್ತುಕ್ರಮ ಕೈಗೊಳ್ಳದಿರಲು ಭೋಜೇಗೌಡ ಆಗ್ರಹ

ಬೆಂಗಳೂರು.07.ಆಕ್ಟೋಬರ.25:- ಶಿಕ್ಷಕರು ಮತ್ತು ಬಿಇಒಗಳ ವಿರುದ್ದ ಶಿಸ್ತುಕ್ರಮಕ್ಕೆ ಸಂಬಂಧಿಸಿ ಹೊರಡಿಸಿರುವ ನೋಟೀಸ ನ್ನು ಹಿಂಪಡೆಯಬೇಕು ಎಂದು ವಿಧಾನಪರಿಷತ್‌ ಸದಸ್ಯ ಎಸ್‌.ಎಲ್‌. ಭೋಜೇಗೌ ಅವರು ಒತ್ತಾಯಿಸಿದ್ದಾರೆ.

ಅಧಿಕಾರಿಗಳ ತಪ್ಪಿನಿಂದ ದಕ್ಷಿಣ ಕನ್ನಡ ಜಿಲ್ಲೆಯಲ್ಲಿ ಜಾತಿ ಸಮೀಕ್ಷೆ ಹಾದಿ ತಪ್ಪಿದೆ ಎಂದು ದೂರಿದ, ಶಿಕ್ಷಕರು ಮತ್ತು ಬಿಇಒಗಳ ವಿರುದ್ದ ಶಿಸ್ತುಕ್ರಮಕ್ಕೆ ಸಂಬಂಧಿಸಿ ಹೊರಡಿಸಿರುವ ನೋಟೀಸ ನ್ನು ಹಿಂಪಡೆಯಬೇಕು ಎಂದು ಒತ್ತಾಯಿಸಿದ್ದಾರೆ.

ಸೋಮವಾರದಂದು ಪತ್ರಿಕಾ ಗೋಷ್ಠಿಯಲ್ಲಿ ಮಾತನಾಡಿದ ಅವರು, ಸಮೀಕ್ಷೆಗೆ ಸೆ.22ರಂದು ಚಾಲನೆ ನೀಡಲಾಗಿತ್ತು. ಆದರೆ ಮಂಗಳೂರಿನಲ್ಲಿ ಸೆ.27ರಂದು ಮೇಲ್ವಿಚಾರಕರನ್ನು ನೇಮಿಸಲಾಗಿದೆ. ಪೂರ್ವಭಾವಿ ಸಿದ್ದತೆಗಳನ್ನು ಸರಿಯಾಗಿ ನಡೆಸಿರಲಿಲ್ಲ. ಸರಿಯಾದ ತರಬೇತಿ ನೀಡಿಲ್ಲ. ಈ ಬಗ್ಗೆ ಜಿಲ್ಲಾಧಿಕಾರಿಗಳ ಗಮನಕ್ಕೆ ತಂದರೂ ಪ್ರಯೋಜನವಾಗಿಲ್ಲ. ಅವೈಜ್ಞಾನಿಕ ನಿರ್ಧಾರಗಳಿಂದಾಗಿ ನಿಗದಿತ ಅವಧಿಯಲ್ಲಿ ಸಮೀಕ್ಷೆ ಪೂರ್ಣಗೊಳಿಸಲಾಗುತ್ತಿಲ್ಲ ಎಂದರು.

ಸಮೀಕ್ಷೆ ಪೂರ್ಣಗೊಂಡ ಮನೆಗಳ ಪಟ್ಟಿಯನ್ನು ಆಯಪ್‌ ನಲ್ಲಿ ಅಳಿಸದೇ ಗಣತಿದಾರರಲ್ಲಿ ಗೊಂದಲ ಮೂಡಿಸಲಾಗಿದೆ. ಗಣತಿದಾರರನ್ನು ಮೇಲ್ವಿಚಾರಣೆ ಮಾಡುವವರಿಗೆ ಒಂದೇ ಪ್ರದೇಶದಲ್ಲಿ ಜವಾಬ್ದಾರಿ ನೀಡದೆ ಬೇರೆ ಬೇರೆ ಪ್ರದೇಶಗಳನ್ನು ನಿಗದಿಗೊಳಿಸಲಾಗಿದೆ. ಖಾಲಿ ಮನೆಗಳನ್ನು ಜಿಪಿಎಸ್‌ ಮೂಲಕ ಗುರುತಿಸಿ ದಾಖಲಿಸುವ ಪ್ರಕ್ರಿಯೆಯಲ್ಲಿಯೂ ಸಮಸ್ಯೆ ಉಂಟಾಗಿದೆ. ಹಾಗಾಗಿ ಸಮೀಕ್ಷೆಗೆ ಹಿನ್ನಡೆಯಾಗಿದೆ ಎಂದರು.

ಕ್ರಮಕ್ಕೆ ಒತ್ತಾಯ
ಜಿಲ್ಲೆಯಲ್ಲಿ ಸಮೀಕ್ಷೆ ಹಾದಿ ತಪ್ಪಲು ಅಪರ ಜಿಲ್ಲಾಧಿಕಾರಿ ರಾಜು ಕೆ. ಅವರೇ ಕಾರಣ. ಸರಕಾರ ಆದೇಶ ಹೊರಡಿಸಿದ 5 ದಿನಗಳ ಅನಂತರ ಅವರು ಕೆಲಸ ಆರಂಭಿಸಿದ್ದರು. ಅಲ್ಲದೆ ಅವೈಜ್ಞಾನಿಕ ತೀರ್ಮಾನಗಳಿಂದಾಗಿ ಶಿಕ್ಷಕರು ತೊಂದರೆಗೊಳಗಾಗುವಂತೆ ಮಾಡಿದರು. ಅವರ ನಿರ್ಧಾರಗಳಿಂದಾಗಿ ಸಮೀಕ್ಷೆ ವಿಫಲವಾಗಿದೆ. ಹಾಗಾಗಿ ಅವರ ವಿರುದ್ದ ಸೂಕ್ತ ಕ್ರಮಕೈಗೊಳ್ಳಬೇಕು ಎಂದು ಒತ್ತಾಯಿಸಿದರು.

ಜಿಲ್ಲಾಧಿಕಾರಿಯಿಂದ ಭರವಸೆ
ನೂರಕ್ಕೂ ಅಧಿಕ ಮಂದಿ ಗಣತಿ ಮೇಲ್ವಿಚಾರಕರು ಭೋಜೇಗೌಡ ಅವರಿಗೆ ಅಹವಾಲು ಸಲ್ಲಿಸಿದರು. ಈ ಕುರಿತು ಭೋಜೇಗೌಡ ಅವರು ಜಿಲ್ಲಾಧಿಕಾರಿ ದರ್ಶನ್‌ ಎಚ್‌.ವಿ ಅವರ ಜತೆ ಮಾತುಕತೆ ನಡೆಸಿದರು. ಮಾತುಕತೆ ಬಳಿಕ ಪ್ರತಿಕ್ರಿಯಿಸಿದ ಭೋಜೇಗೌಡರು, ಜಿಲ್ಲಾಧಿಕಾರಿ ಯವರಿಗೆ ಗಣತಿದಾರರು, ಮೇಲ್ವಿಚಾರಕರ ಸಮಸ್ಯೆ, ಗೊಂದಲಗಳ ಬಗ್ಗೆ ಮನವರಿಕೆ ಮಾಡಿದ್ದು ಸರಿಪಡಿಸುವ ಭರವಸೆ ನೀಡಿದ್ದಾರೆ ಎಂದರು.

ಮಕ್ಕಳ ಪಾಠಕ್ಕೆ ಅಡ್ಡಿ
ಶಿಕ್ಷಕರನ್ನು ಅನ್ಯ ಕಾರ್ಯಗಳಿಗೆ ಬಳಸಬಾರದೆಂಬ ನ್ಯಾಯಾಲಯದ ಆದೇಶವನ್ನು ಉಲ್ಲಂ ಸಲಾಗಿದ್ದು, ಅವರನ್ನೇ ಗರಿಷ್ಠ ಸಂಖ್ಯೆಯಲ್ಲಿ ಸಮೀಕ್ಷೆಗೆ ಬಳಸಲಾಗಿದೆ. ಅಲ್ಲದೇ ಅವರು ಸೇವೆ ಸಲ್ಲಿಸುವ ಪ್ರದೇಶವನ್ನು ಹೊರತುಪಡಿಸಿ ಬೇರೆ ಕಡೆ ನಿಯೋಜಿಸಲಾಗಿದೆ. ಇದು ಸರಿಯಲ್ಲ ಎಂದು ಟೀಕಿಸಿದರು.

ಮಕ್ಕಳಿಗೆ ಪಾಠ ಮಾಡಬೇಕಾದ ಶಿಕ್ಷಕರು ಮನೆ ಮನೆ ಸುತ್ತುತ್ತಿದ್ದಾರೆ. ರಜಾದಿನಗಳಲ್ಲಿಯೂ ಕಾಡು ಗುಡ್ಡಗಳಲ್ಲಿ ಅಲೆದಾಡಿದ್ದಾರೆ. ಸದ್ಯವೇ ತರಗತಿಗಳು ಆರಂಭಗೊಳ್ಳಬೇಕಿದೆ. ಶಿಕ್ಷಕರು ಸಮೀಕ್ಷೆ ಮಾಡಬೇಕೆ ಅಥವಾ ಪಾಠ ಮಾಡಬೇಕೆ ಎಂಬ ಗೊಂದಲದಲ್ಲಿದ್ದಾರೆ. ಇದು ಪರೀಕ್ಷೆ ಫಲಿತಾಂಶಗಳ ಮೇಲೆ ದುಷ್ಪರಿಣಾಮ ಬೀರುವ ಆತಂಕವಿದೆ. ಶಾಲಾ ಪುನರಾರಂಭವನ್ನು ಮುಂದೂಡುವುದಲ್ಲದೇ, ಶಿಕ್ಷಕರಿಗೆ ವಿಶ್ರಾಂತಿಗಾಗಿ ರಜೆ ನೀಡಬೇಕು. ರಜಾ ಅವಧಿಗಳಲ್ಲಿ ಸಮೀಕ್ಷೆ ಮುಂದುವರೆಸಬಾರದು ಎಂದು ಒತ್ತಾಯಿಸಿದರು.