ಅತಿಥಿ ಉಪನ್ಯಾಸಕರ ನೇಮಕಕ್ಕೆ ಆದ ವಿಳಂಬದ ಹಿನ್ನೆಲೆಯಲ್ಲಿ ಸರಕಾರ ಈ ಕ್ರಮ.!

ಮಂಗಳೂರು.10.ಅಕ್ಟೋಬರ.25:- ರಾಜ್ಯದ ಎಲ್ಲಾ ಸರ್ಕಾರಿ ಪ್ರಥಮ ದರ್ಜೆಯ ಕಾಲೇಜಿನಲ್ಲಿ ಅತಿಥಿ ಉಪನ್ಯಾಸಕರ ನೇಮಕಕ್ಕೆ ಆದ ವಿಳಂಬದ ಹಿನ್ನೆಲೆಯಲ್ಲಿ ಸರಕಾರ ಈ ಶೈಕ್ಷಣಿಕ ಸಾಲಿನ ವಿವಿಧ ಪದವಿ, ಸ್ನಾತಕೋತ್ತರ ಪದವಿಗಳ ವೇಳಾಪಟ್ಟಿಯನ್ನು ಪರಿಷ್ಕರಿಸಿದೆ. ಹಾಗಾಗಿ ಮಂಗಳೂರು ವಿಶ್ವವಿದ್ಯಾಲಯ ವೇಳಾಪಟ್ಟಿಯೂ ಒಂದು ತಿಂಗಳು ಮುಂದುವರಿದ್ದಾರೆ.

ಗುರುವಾರ ಶೈಕ್ಷಣಿಕ ಮಂಡಳಿ ಸಭೆಯ ಅಧ್ಯಕ್ಷತೆ ವಹಿಸಿ ಮಾತನಾಡಿದ ವಿವಿ ಕುಲಪತಿ ಪ್ರೊ|ಪಿ.ಎಲ್‌.ಧರ್ಮ, ಸರಕಾರಿ ಪದವಿ ಕಾಲೇಜುಗಳಿಗೆ ಅತಿಥಿ ಉಪನ್ಯಾಸಕರ ನೇಮಕವೇ ಆಗದ ಕಾರಣ ಬೋಧನ ಚಟುವಟಿಕೆ ಅಸ್ತವ್ಯಸ್ತಗೊಂಡಿದ್ದರಿಂದ ಕಾಲೇಜು ಶಿಕ್ಷಣ ಇಲಾಖೆಯು ವೇಳಾಪಟ್ಟಿ ಪರಿಷ್ಕರಿಸಿದೆ ಎಂದರು.

ಮಂಗಳೂರು ವಿವಿಯಲ್ಲಿ ಕೋವಿಡ್‌ ಅನಂತರ ವೇಳಾಪಟ್ಟಿಯಲ್ಲಿ ಸುಮಾರು 90 ದಿನಗಳ ವಿಳಂಬ ಉಂಟಾಗಿದ್ದುದನ್ನು 45 ದಿನಕ್ಕೆ ಇಳಿಸಿದ್ದೆವು. ಹೊಸ ಶೈಕ್ಷಣಿಕ ವೇಳಾಪಟ್ಟಿಯನ್ನೂ ಎಲ್ಲ ಕಾಲೇಜುಗಳಿಗೆ ನೀಡಿದ್ದೆವು. ಆದರೆ ಈಗ ಏನೂ ಮಾಡುವಂತಿಲ್ಲ. ನಮ್ಮಲ್ಲಿ ಅತಿಥಿ ಉಪನ್ಯಾಸಕರ ನೇಮಕ ಮೊದಲೇ ಆಗಿತ್ತು. ಆದರೆ ಸರಕಾರದ ಆದೇಶದಂತೆ ಅತಿಥಿ ಉಪನ್ಯಾಸಕರಿಗೆ ಒಂದು ತಿಂಗಳ ವೇತನ ರಹಿತ ರಜೆ ಇರುತ್ತದೆ. ವಿದ್ಯಾರ್ಥಿಗಳು ರಜೆಯಲ್ಲಿ ಅಧ್ಯಯನ ಮಾಡಬೇಕಿರುತ್ತದೆ. ಎಲ್ಲಾ ಅಧೀನ ಖಾಸಗಿ ಕಾಲೇಜುಗಳಲ್ಲೂ ವಿದ್ಯಾರ್ಥಿಗಳಿಗೆ ಅಧ್ಯಯನ ರಜೆ ನೀಡಬಹುದು, ಉತ್ತಮವಾಗಿ ಪರೀಕ್ಷೆಗೆ ಸಿದ್ಧಗೊಳ್ಳಬಹುದು ಎಂದರು.

ಮೌಲ್ಯಮಾಪನ ತ್ವರಿತಗೊಳಿಸುವ ಇರಾದೆ ಹೊಂದಿದ್ದು, ರಿಮೋಟ್‌ ಆಧಾರದಲ್ಲಿ ಇದನ್ನು ಕೈಗೊಳ್ಳುವ ಬಗ್ಗೆ ಪ್ರಸ್ತಾವನೆಯನ್ನು ಯುಯು ಸಿಎಂ ಎಸ್‌ನವರಿಗೆ ಕಳಿಸಿದ್ದೇವೆ. ಅನುಮೋದನೆ ಸಿಕ್ಕಿದರೆ ಮೌಲ್ಯಮಾಪನ ಚುರುಕಾಗಬಹುದು ಎಂದರು.

ವೇಳಾಪಟ್ಟಿ

ಮಂಗಳೂರು ವಿವಿಯಲ್ಲಿ 1,3,5ನೇ ಸೆಮಿಸ್ಟರ್‌ ತರಗತಿಗಳು ನವೆಂಬರ್‌ 22ರ ಬದಲು ಡಿಸೆಂಬರ್‌20ಕ್ಕೆ ಮುಗಿಯಲಿವೆ. 2, 4, 6ನೇ ಸೆಮಿಸ್ಟರ್‌ ತರಗತಿಗಳು 12 -01-2026ರ ಬದಲು 10-02-2026ರಿಂದ ಕಾರ್ಯಾರಂಭಿಸಲಿವೆ. 2,4,6ನೇ ಸೆಮಿಸ್ಟರ್‌ ತರಗತಿಗಳು 08-05-2026ಕ್ಕೆ ಪೂರ್ಣಗೊಳ್ಳುವ ಬದಲಿಗೆ 05-06-2026ಕ್ಕೆ ಪೂರ್ಣಗೊಳ್ಳಲಿವೆ. ಮುಂದಿನ ಶೈಕ್ಷಣಿಕ ವರ್ಷ 2026ರ ಆಗಸ್ಟ್‌ ನಲ್ಲಿ ಆರಂಭಗೊಳ್ಳಲಿವೆ

ಸ್ವಾಯತ್ತ ಸ್ಥಾನಮಾನ

ವಿವಿಯ ಸಂಯೋಜಿತ ಕಾಲೇಜು ಆಗಿರುವ ಕೆನರಾ ಕಾಲೇಜಿಗೆ ಸ್ವಾಯತ್ತತೆ ನೀಡುವ ಪ್ರಸ್ತಾವಕ್ಕೆ ಅನುಮೋದನೆ ಸಿಕ್ಕಿತು. 2025-26ನೇ ಸಾಲಿನಿಂದ 2035-36ನೇ ಸಾಲಿನ ವರೆಗೆ ಸ್ವಾಯತ್ತೆ ನೀಡಲು ಸ್ಥಾಯೀ ಸಮಿತಿ ಪರಿಶೀಲಿಸಿ ವರದಿ ಸಲ್ಲಿಸಿತ್ತು.

ಪಿಎಚ್‌ಡಿ ನಿಯಮಾವಳಿ ಬದಲಾವಣೆ

ರಾಷ್ಟ್ರೀಯ ಶಿಕ್ಷಣ ನೀತಿಯಂತೆ ಪಿಎಚ್‌ಡಿ ಪದವಿ ಕಾರ್ಯಕ್ರಮಗಳಿಗೂ ಕನಿಷ್ಠ ಮಾನದಂಡ ಮತ್ತು ಕಾರ್ಯವಿಧಾನವನ್ನು ಪರಿಷ್ಕರಿಸಲು ಯುಜಿಸಿ ಸೂಚಿಸಿದೆ. ಅದರಂತೆ ವಿವಿಯಲ್ಲೂ ಪಿಎಚ್‌ಡಿ ಕಾರ್ಯಕ್ರಮವನ್ನು ನಿಯಂತ್ರಿಸುವ ವಿನಿಮಯದ ಬಗ್ಗೆಯೂ ಚರ್ಚೆ ನಡೆಯಿತು. ಹೊರರಾಜ್ಯಗಳ ವಿದ್ಯಾರ್ಥಿಗಳಿಗೆ ಇಲ್ಲಿ ಮೀಸಲು ಅನ್ವಯವಾಗದ ಹಿನ್ನೆಲೆಯಲ್ಲಿ ಸೀಟುಗಳನ್ನು ಬಾಕಿ ಇರಿಸಬೇಕೇ ಬೇಡವೇ ಎಂಬ ಬಗ್ಗೆ ಚರ್ಚೆ ನಡೆದಿದ್ದು, ಇನ್ನೊಂದು ಸಭೆ ನಡೆಸಲು ತೀರ್ಮಾನಿಸಲಾಯಿತು.

ಅನುಪಾಲನ ವರದಿ ಸಲ್ಲಿಕೆ

ವಿವಿಯ 2021-22ನೇ ಹಾಗೂ 2022-23ನೇ ಸಾಲಿನ ಲೆಕ್ಕಪರಿಶೋಧನ ವರದಿ ಮೇಲಿನ ಅನುಪಾಲನ ವರದಿಗಳನ್ನು ಸಭೆ ಅನುಮೋದಿಸಿತು. ಇದೇ ವೇಳೆ 2024-25ನೇ ಸಾಲಿನ ವಾರ್ಷಿಕ ಲೆಕ್ಕಪತ್ರಗಳನ್ನೂ ಅನುಮೋದಿಸಲಾಯಿತು.

2021-22ರಲ್ಲಿ ಆಕ್ಷೇಪಣೆಯಲ್ಲಿರುವ 104.66 ಕೋಟಿ ರೂ. ಹಾಗೂ ವಸೂಲಾತಿಗೆ ಸೂಚಿಸಿರುವ 2.31 ಕೋಟಿ ರೂ. ಹಾಗೂ 2022-2ರಲ್ಲಿ ಆಕ್ಷೇಪಣೆಯಲ್ಲಿರುವ 61.30 ಕೋ.ರೂ ಹಾಗೂ ವಸೂಲಾತಿಗೆ ಸೂಚಿಸಿರುವ 4.69 ಕೋ.ರೂ. ಲೆಕ್ಕಪರಿಶೋಧನ ವರದಿಯ ಮೇಲೆ ವಿವಿ ಕೈಗೊಂಡ ಕ್ರಮವನ್ನು ಆಧರಿಸಿ ಅನುಪಾಲನ ವರದಿ ಸಿದ್ಧಪಡಿಸಲಾಗಿದೆ.

ಕುಲಸಚಿವ ರಾಜು ಮೊಗವೀರ, ಪರೀಕ್ಷಾಂಗ ಕುಲಸಚಿವ ಡಾ| ದೇವೇಂದ್ರಪ್ಪ, ಹಣಕಾಸು ಅಧಿಕಾರಿ ಪಂಚಲಿಂಗಸ್ವಾಮಿ ಉಪಸ್ಥಿತರಿದ್ದರು.

ಡೇಟಾ ಅನಾಲಿಟಿಕ್ಸ್‌, ಎಐ ಕೋರ್ಸ್‌ಗಳಿಗೆ ಅನುಮೋದನೆ

ಸ್ವಾಯತ್ತ ಕಾಲೇಜುಗಳು 2025-26ನೇ ಸಾಲಿನಲ್ಲಿ ಹೊಸ ಸ್ನಾತಕ ಮತ್ತು ಸ್ನಾತಕೋತ್ತರ ಕೋರ್ಸ್‌ ಆರಂಭಿಸಲು ಅನುಮೋದನೆ ನೀಡಲಾಯಿತು. ವಿವೇಕಾನಂದ ಕಾಲೇಜು ಪುತ್ತೂರು ಬಿಕಾಂ (ಬಿಸಿನೆಸ್‌ ಡೇಟ ಅನಾಲಿಟಿಕ್ಸ್‌), ಬಿಬಿಎ ಲಾಜಿಸ್ಟಿಕ್ಸ್‌, ಬಿಸಿಎ ಸೈಬರ್‌ಸೆಕ್ಯೂರಿಟಿ, ಎಂಎಸ್ಸಿ ಕೈಗಾರಿಕಾ ರಸಾಯನ ಶಾಸ್ತ್ರ, ಸಂತ ಫಿಲೋಮಿನ ಪುತ್ತೂರು ಬಿಎಸ್ಸಿ ಡಾಟಾ ಸೈನ್ಸ್‌, ಬಿಬಿಎ ಡಾಟಾ ಅನಾಲಿಟಿಕ್ಸ್‌, ಬಿಕಾಂ, ಸಂತ ಆಯಗ್ನೆಸ್‌ ಮಂಗಳೂರು ಬಿಸಿಎ ಎಐ ಆಯಂಡ್‌ ಮೆಷಿನ್‌ ಲರ್ನಿಂಗ್‌ ಬಿಎಸ್ಸಿ ಡೇಟಾ ಸೈನ್ಸ್‌, ಎಂಎಸ್ಸಿ ಕೌನ್ಸೆಲಿಂಗ್‌ ಕೋರ್ಸ್‌ ಅನುಮೋದಿಸಲಾಯಿತು.

ಆಳ್ವಾಸ್‌ ಕಾಲೇಜು ಮೂಡುಬಿದಿರೆ ಇಲ್ಲಿ ಸ್ಟ್ರಾಟೆಜಿಕ್‌ ಫೈನಾನ್ಸ್‌, ಇಂಟರ್‌ನ್ಯಾಶನಲ್‌ ಫೈನಾನ್ಸ್‌, ಲೀಗಲ್‌ ಕಾಂಪ್ಲಯನ್ಸ್‌, ಅಕೌಂಟಿಂಗ್‌ ಆಯಂಡ್‌ ಆಡಿಟ್‌, ಇಂಟರ್‌ನ್ಯಾಶನಲ್‌ ಅಕೌಂಟಿಂಗ್‌, ಬ್ಯಾಂಕಿಂಗ್‌ ಆಯಂಡ್‌ ಇನ್ಶೂರೆನ್ಸ್‌, ಬಿಸಿನೆಸ್‌ ಡೇಟಾ ಅನಾಲಿಟಿಕ್ಸ್‌ ಗಳಲ್ಲಿ ಬಿಕಾಂ, ಎಐ ಆಯಂಡ್‌ ಮೆಷಿನ್‌ ಲರ್ನಿಂಗ್‌ ಬಿಸಿಎ, ಗಣಿತ-ಸಂಖ್ಯಾಶಾಸ್ತ್ರ-ಗಣಕವಿಜ್ಞಾನ ಬಿಎಸ್ಸಿ ಕೋರ್ಸ್‌ಗಳಿಗೂ ಅನುಮೋದಿಸಲಾಯಿತು.